ନୂଆଦିଲ୍ଲୀ, ୦୧/୦୯ : ଅନ୍ତର୍ଜାତୀୟ ଫୁଟବଲକୁ ମେସିଙ୍କ ଅଲବିଦା । ଫୁଟବଲ ଜଗତରେ ଏକ ସ୍ୱର୍ଣ୍ଣିମ ଯୁଗର ଅବସାନ। ଆର୍ଜେଣ୍ଟିନାର କିମ୍ବଦନ୍ତୀ ଫୁଟବଲର ଲିଓନେଲ ମେସି ଅନ୍ତର୍ଜାତୀୟ ଫୁଟବଲରୁ ଅବସର ଘୋଷଣା କରିଛନ୍ତି। ଏହା ସହ ଆର୍ଜେଣ୍ଟିନା ଜର୍ସିରେ ମେସିଙ୍କ ଦୀର୍ଘ ଓ ଐତିହାସିକ ଯାତ୍ରାରେ ପୂର୍ଣ୍ଣଚ୍ଛେଦ ପଡ଼ିଛି। ଆଉ ଦେଶ ପାଇଁ ଖେଳିବେ ନାହିଁ ମେସି। ପ୍ରାୟ ଦୁଇ ଦଶନ୍ଧି ଧରି ଆର୍ଜେଣ୍ଟିନା ଫୁଟବଲର ସବୁଠାରୁ ବଡ଼ ଚେହେରା ଥିଲେ ମେସି। ଯୁବ ଖେଳାଳି ଭାବେ ଜାତୀୟ ଦଳରେ ପାଦ ରଖିଥିବା ମେସି ପରବର୍ତ୍ତୀ ସମୟରେ ଦଳର ଅଧିନାୟକ ହେବା ସହ ଆର୍ଜେଣ୍ଟିନାକୁ ବିଶ୍ୱ ଫୁଟବଲର ଶୀର୍ଷକୁ ନେଇଥିଲେ।
ମେସିଙ୍କ ଅନ୍ତର୍ଜାତୀୟ କ୍ୟାରିୟରର ସବୁଠାରୁ ବଡ଼ ସଫଳତା ଆସିଥିଲା ୨୦୨୨ ଫିଫା ବିଶ୍ୱକପରେ। କାତାରରେ ତାଙ୍କ ନେତୃତ୍ୱରେ ଆର୍ଜେଣ୍ଟିନା ବିଶ୍ୱକପ୍ ଜିତିଥିଲା। ଫାଇନାଲରେ ଫ୍ରାନ୍ସକୁ ପେନାଲ୍ଟି ସୁଟଆଉଟରେ ହରାଇ ଆର୍ଜେଣ୍ଟିନା ୩୬ ବର୍ଷ ପରେ ବିଶ୍ୱ ଚାମ୍ପିଅନ୍ ହୋଇଥିଲା। ମେସିଙ୍କ କ୍ୟାରିୟରରେ ଯେଉଁ ଗୋଟିଏ ବଡ଼ ଟ୍ରଫିର ଅଭାବ ଥିଲା, ସେହି ବିଶ୍ୱକପ୍ ମଧ୍ୟ ତାଙ୍କ ହାତକୁ ଆସିଥିଲା। କେବଳ ବିଶ୍ୱକପ୍ ନୁହେଁ, ମେସିଙ୍କ ନେତୃତ୍ୱରେ ଆର୍ଜେଣ୍ଟିନା ୨୦୨୧ ଓ ୨୦୨୪ କୋପା ଆମେରିକା ଟାଇଟଲ୍ ମଧ୍ୟ ଜିତିଥିଲା। ୨୦୨୨ରେ ଫିନାଲିସିମା ଟ୍ରଫି ମଧ୍ୟ ଆର୍ଜେଣ୍ଟିନା ନିଜ ନାମରେ କରିଥିଲା। ଏହି ସଫଳତାଗୁଡ଼ିକ ମେସିଙ୍କ ଜାତୀୟ ଦଳ କ୍ୟାରିୟରକୁ ଆହୁରି ସ୍ମରଣୀୟ କରିଥିଲା।
ଆର୍ଜେଣ୍ଟିନା ଜର୍ସିରେ ମେସି କେବଳ ଗୋଲ୍ କିମ୍ବା ଟ୍ରଫି ପାଇଁ ସ୍ମରଣୀୟ ରହିବେ ନାହିଁ। ତାଙ୍କ ଡ୍ରିବ୍ଲିଂ, ପାସ୍, ଫ୍ରି-କିକ୍, ଗୋଲ୍ ସୃଷ୍ଟି କରିବାର କ୍ଷମତା ଏବଂ ଚାପ ଭିତରେ ମ୍ୟାଚ୍ ର ଗତି ବଦଳାଇ ଦେବାର ଦକ୍ଷତା ତାଙ୍କୁ ଏକ ଅଲଗା ପରିଚୟ ଦେଇଥିଲା। ନୀଳ-ଧଳା ଜର୍ସିରେ ମେସିଙ୍କ ଯାତ୍ରା ଏବେ ଶେଷ। କିନ୍ତୁ ବିଶ୍ୱକପ୍ ଉଠାଇଥିବା ସେହି ମୁହୂର୍ତ୍ତଠାରୁ କୋପା ଆମେରିକା ବିଜୟ ପର୍ଯ୍ୟନ୍ତ—ଆର୍ଜେଣ୍ଟିନା ଫୁଟବଲରେ ତାଙ୍କ ନାମ ଓ ଅବଦାନ ଦୀର୍ଘଦିନ ଧରି ସ୍ମରଣୀୟ ହୋଇ ରହିବ।
