ସମ୍ବଲପୁର,୧୧/୭: ଏଣିକି ଡାକ୍ତରୀ ଛାତ୍ରଙ୍କ ପାଇଁ ଆର୍ଥିକ ବଣ୍ଡ୍ ବ୍ୟବସ୍ଥା ଲାଗୁ ହେବ। ଉତ୍ତୀର୍ଣ୍ଣ ହେବା ପରେ ସେମାନଙ୍କ ସହ ଚୁକ୍ତି କରାଯିବ। ଓଡ଼ିଶାର ବିଭିନ୍ନ ସରକାରୀ ଓ ଘରୋଇ ମେଡିକାଲ କଲେଜରେ ପାଠ ପଢିବା ପରେ ଅଧିକ ରୋଜଗାର ଉଦ୍ଦେଶ୍ୟରେ ଡାକ୍ତରମାନେ ରାଜ୍ୟ ବାହାରକୁ ଚାଲି ଯାଉଛନ୍ତି। ଏଣିକି ଏହା ଉପରେ ରୋକ୍ ଲଗାଯିବା ପାଇଁ ରାଜ୍ୟ ସରକାର ସ୍ଥିର କରିଛନ୍ତି । ଯେଉଁ ଡାକ୍ତରମାନେ ରାଜ୍ୟ ବାହାରକୁ ଯିବେ ସେମାନଙ୍କ ବିରୋଧେରେ କଡା କାର୍ଯ୍ୟାନୁଷ୍ଠାନ ପାଇଁ ନିୟମ ଲାଗୁ କରାଯିବ ବୋଲି ସ୍ୱାସ୍ଥ୍ୟମନ୍ତ୍ରୀ ନବ କିଶୋର ଦାସ କହିଛନ୍ତି।
ସମ୍ବଲପୁର ଜିଲା ବୁର୍ଲା ବୀର ସୁରେନ୍ଦ୍ର ସାଏ ଇନଷ୍ଟିଚ୍ୟୁଟ୍ ଅଫ୍ ମେଡିକାଲ ସାଇନ୍ସ ଆଣ୍ଡ ରିସର୍ଚ୍ଚ (ଭିମ୍ସାର)ରେ ବୁଧବାର ସ୍ୱାସ୍ଥ୍ୟମନ୍ତ୍ରୀ ଦାସ ଏକ ସମୀକ୍ଷା ବୈଠକରେ ଯୋଗ ଦେଇ ଏହା କହିଛନ୍ତି। ଏହି ଅବସରରେ କର୍ତ୍ତୃପକ୍ଷଙ୍କ ସହ ଆଲୋଚନା କରିବା ସହ ବିଭିନ୍ନ ସମସ୍ୟା ଓ ଅଭାବ ଅସୁବିଧା ସମ୍ପର୍କରେ ସେ ଆଲୋଚନା କରିଥିଲେ। ଭିମସାରରେ ଥିବା ଛୋଟ ସମସ୍ୟାଗୁଡିକ ବିଭାଗୀୟ ମୁଖ୍ୟମାନେ ସମାଧାନ କରନ୍ତୁ। ସମସ୍ତଙ୍କ ସହଯୋଗରେ ମେଡିକାଲର ଉନ୍ନତି ହେବ। ରୋଗୀମାନେ ଉତ୍ତମ ସ୍ୱାସ୍ଥ୍ୟ ସେବା ପାଇ ପାରିବେ ବୋଲି ସେ କହିଛନ୍ତି। ସେହିଭଳି ନିଯୁକ୍ତି ପ୍ରକ୍ରିୟା ତ୍ୱରାନ୍ବିତ କରି ଖାଲି ପଡିଥିବା ବିଭିନ୍ନ ପଦବୀ ୩ ମାସ ଭିତରେ ପୂରଣ କରିବାକୁ ସେ କର୍ତ୍ତୃପକ୍ଷଙ୍କୁ ନିର୍ଦ୍ଦେଶ ଦେଇଛନ୍ତି। ଭିମ୍ସାର ସ୍ବୟଂଶାସିତ ହୋଇଥିବାରୁ ନିର୍ଦ୍ଦେଶକଙ୍କ ସମସ୍ତ କ୍ଷମତା ରହିଛି। ଏଣୁ ବୈଠକ କରି ଯେକୌଣସି ସମସ୍ୟାର ସମାଧାନ କରାଯାଇ ପାରିବ । ରାଜ୍ୟ ସରକାର ଓ ସ୍ୱାସ୍ଥ୍ୟ ବିଭାଗ ପକ୍ଷରୁ ସମସ୍ତ ସହଯୋଗ କରାଯିବ ବୋଲି ସ୍ୱାସ୍ଥ୍ୟମନ୍ତ୍ରୀ ଉପସ୍ଥିତ ବିଭାଗୀୟ ମୁଖ୍ୟମାନଙ୍କୁ କହିଛନ୍ତି।
ସମୀକ୍ଷା ବୈଠକ ପରେ ଖବରଦାତା ସମ୍ମିଳନୀରେ ସ୍ୱାସ୍ଥ୍ୟମନ୍ତ୍ରୀ ଦାସ କହିଛନ୍ତି, ରାଜ୍ୟରେ ୨ ବର୍ଷ ଭିତରେ ଡାକ୍ତର ସମସ୍ୟା ଦୂର ହେବ । ଭିମ୍ସାର ସମେତ ଜିଲାର ଅନ୍ୟ ଡାକ୍ତରଖାନାରେ ଆବଶ୍ୟକ ଡାକ୍ତର ପୂରଣ ହେବ । ଭିମ୍ସାରରେ ରହିଥିବା ପ୍ରଫେସର, ସହକାରୀ ପ୍ରଫେସର ଆଦି ମୋଟ ୧୧୮ଟି ପଦବୀ ସହ ଅନ୍ୟାନ୍ୟ ପଦବୀ ଶୀଘ୍ର ପୂରଣ ହେବ। ଭିମସାର ପରିସରରେ ବିଭିନ୍ନ ବିଭାଗ ପାଇଁ ସ୍ବତନ୍ତ୍ର କୋଠା ନିର୍ମାଣ କରାଯିବ। ଏବେ ଡାଏଲିସିସି ବିଭାଗରେ ମୋଟ ୧୪ ସିଟ୍ ରହିଛି । ଏଥିରେ ଆହୁରି ୪ଟି ସିଟ୍ ବଢାଯିବ। ଅନ୍ୟପକ୍ଷେ ରାଜ୍ୟରେ ଆଉ ୪ଟି ମେଡିକାଲ କଲେଜ ପ୍ରତିଷ୍ଠା ପାଇଁ ପ୍ରକ୍ରିୟା ଆରମ୍ଭ ହୋଇଛି। ଭିମ୍ସାର୍ ସ୍ଥାୟୀ ନିର୍ଦ୍ଦେଶକ ପଦ ପୂରଣ ପାଇଁ ନିଯୁକ୍ତି ପ୍ରକ୍ରିୟା ସରି ଯାଇଛି। ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନାରେ ଏଠାରେ କିଭଳି ରୋଗୀମାନେ ଲାଭ ପାଇବେ ସେ ଦିଗରେ ପଦକ୍ଷେପ ଗ୍ରହଣ କରାଯାଉଛି ବୋଲି ସେ କହିଥିଲେ। ଏହି ସମୀକ୍ଷା ବୈଠକରେ ସ୍ୱାସ୍ଥ୍ୟ ସଚିବ ପ୍ରମୋଦ ମେହେର୍ଦ୍ଦା, ଯୁଗ୍ମ ସଚିବ ଗୁହା ପୁନମ ତାପସ କୁମାର, ଜିଲାପାଳ ଶୁଭମ୍ ସକ୍ସେନାଙ୍କ ସମେତ ମେଡିକାଲର ସମସ୍ତ ବିଭାଗର ମୁଖ୍ୟମାନେ ଉପସ୍ଥିତ ଥିଲେ। ଅନ୍ୟପକ୍ଷେ ଆଇସିୟୁ ଭିତରକୁ ଯାଇ ମନ୍ତ୍ରୀ ଦାସ ରୋଗୀଙ୍କ ସହ ଆଲୋଚନା କରୁଥିବା ସମୟରେ ବିଦ୍ୟୁତ୍ ସରବରାହ ବନ୍ଦ ହୋଇଯାଇଥିଲା । ପ୍ରାୟ ୪ ମିନଟ ପରେ ପୁଣି ବିଦ୍ୟୁତ୍ ଆସିଥିଲା । ଏଥିରେ ବିରକ୍ତି ପ୍ରକାଶ କରି ମେଡିକାଲକୁ ସ୍ବତନ୍ତ୍ର ବିଦ୍ୟୁତ୍ ବ୍ୟବସ୍ଥା କରିବାକୁ ମନ୍ତ୍ରୀ ଦାସ ସେଠାରେ ଉପସ୍ଥିତ ଅଧିକାରୀମାନଙ୍କୁ ନିର୍ଦ୍ଦେଶ ଦେଇଥିଲେ।
