ଭୁବନେଶ୍ୱର,୧୯/୮: ରାଜ୍ୟରେ ୨ଲକ୍ଷ କୋଟି ଟଙ୍କାର ପୁଞ୍ଜି ନିବେଶକୁ ଆଜି ମଞ୍ଜୁରୀ ମିଳିଛି । ରାଜ୍ୟ ହାଇଲେବଲ କ୍ଲିଅରାନ୍ସ ଅଥରିଟି ବୈଠକରେ ପୁଞ୍ଚି ନିବେଶକୁ ମଞ୍ଜୁରୀ ମିଳିଛି । ବିଭିନ୍ନ କ୍ଷେତ୍ରରେ ନିବେଶ ପରେ ରାଜ୍ୟରେ ୨୭୦୦୦ରୁ ଅଧିକ ଲୋକଙ୍କୁ ନିଯୁକ୍ତିର ଅବସର ମିଳିବ ।
ଆଜି ଭୁବନେଶ୍ୱର ଖାରବେଳ ଭବନରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଅଧ୍ୟକ୍ଷତାରେ ରାଜ୍ୟ ହାଇଲେଭେଲ କ୍ଲିଅରାନ୍ସ ଅଥରିଟି ବୈଠକ ବସିଛି । ଏହି ବୈଠକରେ ରାଜ୍ୟରେ ୨ଲକ୍ଷ କୋଟି ଟଙ୍କାର ପୁଞ୍ଜି ନିବେଶକୁ ମଞ୍ଜୁରୀ ପ୍ରଦାନ କରାଯାଇଛି । ଏଥିରେ ୫ଟି ପେଟ୍ରୋକେମିକାଲ୍ସ ପ୍ରକଳ୍ପ ପାଇଁ ମଞ୍ଜୁରୀ ମିଳିଛି । ହଳଦିଆ ପେଟ୍ରୋକେମିକାଲ୍ସ ସୁବର୍ଣ୍ଣରେଖା ବନ୍ଦର ନିକଟରେ ପ୍ରକଳ୍ପ କରିବ । ହାଇଡ୍ରୋ କାର୍ବନ ପ୍ରସେସିଂ କମ୍ପଲେକ୍ସରେ ୭୪ହଜାର କୋଟି ଟଙ୍କା ନିବେଶ କରାଯିବ । ହଳଦିଆ କେମିକାଲ୍ସ ପ୍ରକଳ୍ପ ଦ୍ୱାରା ରାଜ୍ୟରେ ୧୦ହଜାର ନିଯୁକ୍ତି ସୁଯୋଗ ରହିଛି ।
ଏହି ମିଟିଂରେ ତୈଳ ବିଶୋଧନାଗାର ସଂପ୍ରସାରଣକୁ ମଧ୍ୟ ଏଚଏଲସିଏ ମଂଜୁରୀ ମିଳିଛି । ଏହି ସଂପ୍ରସାରଣ ସହ କିଛି ନୂଆ ପ୍ଲାଣ୍ଟ ମଧ୍ୟ କରାଯିବ ଏବଂ ଏଥିରେ ୧ଲକ୍ଷ କୋଟି ନିବେଶ କରାଯିବ । ତୈଳ ବିଶୋଧନାଗାର ସଂପ୍ରସାରଣ ଓ ନୂଆ ପ୍ଲାଣ୍ଟରେ ୧୨,୫୯୫ ଲୋକଙ୍କୁ ନିଯୁକ୍ତି ସୁଯୋଗ ରହିବ । ଏହା ସହ ତୈଳ ବିଶୋଧନାଗାର ପରିସରରେ PX- PTAକୁ ବି ମଞ୍ଜୁରୀ ମିଳିଛି । ଏଥିରେ ୯୧୩୬କୋଟି ଟଙ୍କା ନିବେଶ କରାଯିବ ଯେଉଁଥିରେ ୩୨୦୦ ଜଣ ନିଯୁକ୍ତି ପାଇବେ ।
ସେହିପରି କଳିଙ୍ଗ ନଗରରେ ଜିନ୍ଦଲ ଷ୍ଟିଲ ପ୍ରସେସିଂ ପ୍ଲାଣ୍ଟକୁ ମଧ୍ୟ ଏଚଏଲସିଏର ମଞ୍ଜୁରୀ ମିଳିିଛି । ଏହି ପ୍ଲାଣ୍ଟରେ ୧୬୭୬କୋଟି ଟଙ୍କା ନିବେଶ କରାଯିବା ସହ ୧୩୦୦ଜଣଙ୍କୁ ନିଯୁକ୍ତି ପ୍ରଦାନ କରାଯିବ । ତାଳଚେର ସାର କାରଖାନାକୁ ମଧ୍ୟ ମଞ୍ଜୁରୀ ଦିଆଯାଇଛି । ସେଠାରେ ୧୪,୭୩୨କୋଟି ନିବେଶ କରାଯାଇ ୟୁରିଆ ଉତ୍ପାଦନ କରାଯିବା ସହ ୫୫୦ଜଣଙ୍କୁ ନିଯୁକ୍ତି ଦିଆଯିବ ।
ଆଜି ଭୁବନେଶ୍ୱର ଖାରବେଳ ଭବନରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଅଧ୍ୟକ୍ଷତାରେ ବସିଥିବା ରାଜ୍ୟ ହାଇଲେଭେଲ କ୍ଲିଅରାନ୍ସ ଅଥରିଟି ବୈଠକରେ ଖଣି ଇସ୍ପାତ ମନ୍ତ୍ରୀ, ଶକ୍ତି ମନ୍ତ୍ରୀ , ମୁଖ୍ୟ ସଚିବ ପ୍ରମୁଖ ଉପସ୍ଥିତ ଅଛନ୍ତି ।
