ରାୟଗଡ଼ା,୨/୩: ଜଣେ ଯୁକ୍ତ ଦୁଇ କଳା ଛାତ୍ରୀ ପରୀକ୍ଷା ଦେଇ ଫେରୁଥିବା ବେଳେ ଜଣେ ଯୁବକ ଛୁରୀରେ ତାଙ୍କ ବେକ କାଟି ଆକ୍ରମଣ କରିଛି । ଛାତ୍ରୀଙ୍କ ଅବସ୍ଥା ଗୁରୁତର ଥିବା ବେଳେ ଅଭିଯୁକ୍ତକୁ ପୁଲିସ୍ ଅଟକ ରଖିଛି। ଘଟଣାଟି ଘଟିଛି ରାୟଗଡ଼ା ଜିଲ୍ଲା ଗୁମୁଡ଼ାରେ।
ଗୁରୁତର ଛାତ୍ରୀ ଜଣଙ୍କ ଗୁମୁଡ଼ା ସ୍ଥିତ ଦ୍ରୌପଦୀ କଲେଜରେ ପଢ଼ନ୍ତି। ତାଙ୍କ ଘର ବିଷମକଟକ ଅଞ୍ଚଳରେ। ଆଜିଠୁ ଯୁକ୍ତ ଦୁଇ କଳା ପରୀକ୍ଷା ଆରମ୍ଭ ହୋଇଥିବା ବେଳେ ସେ ମଧ୍ୟ ପରୀକ୍ଷା ଦେବାକୁ ଯାଇଥିଲେ। ପରୀକ୍ଷା ଦେଇ ଫେରିବା ବେଳେ କଲେଜ ନିକଟରେ ଜଣେ ଯୁବକ ହଠାତ୍ ତାଙ୍କୁ ଛୁରୀରେ ଆକ୍ରମଣ କରିଥିଲେ। ଯୁବକ ଜଣଙ୍କ ତାଙ୍କ ବେକ କାଟି ଦେଇଥିଲେ। ଛାତ୍ରୀ ଜଣଙ୍କୁ ଉଦ୍ଧାର କରି ସଙ୍ଗେ ସଙ୍ଗେ ପଦ୍ମପୁର ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ନିଆଯାଇଥିଲା। ତେବେ ଅବସ୍ଥା ଗୁରୁତର ଥିବାରୁ ତାଙ୍କୁ ପ୍ରାଥମିକ ଚିକିତ୍ସା ପରେ ବ୍ରହ୍ମପୁର ବଡ଼ ଡାକ୍ତରଖାନାକୁ ସ୍ଥାନାନ୍ତର କରାଯାଇଛି।
ଅନ୍ୟପକ୍ଷରେ ଛାତ୍ରୀ ଜଣଙ୍କୁ ଆକ୍ରମଣ କରିଥିବା ଯୁବକଙ୍କୁ ସ୍ଥାନୀୟ କିଛି ଲୋକ ଧରି ପୁଲିସ୍ ଜିମାରେ ଦେଇଥିଲେ। ଖବର ଲେଖାଯିବା ବେଳକୁ ତାଙ୍କ ପରିଚୟ ମିଳି ପାରି ନଥିଲା। ପୁଲିସ୍ ତାଙ୍କୁ ଅଟକ ରଖି ପଚରାଉଚରା କରୁଛି। କାହିଁକି ଏଭଳି ଏକ କାଣ୍ଡ ସେ ଭିଆଇଲେ, ତାହା ଜଣାପଡ଼ି ନାହିଁ। ଛାତ୍ରୀ ଜଣଙ୍କ ତାଙ୍କୁ ଚିହ୍ନିଛନ୍ତି ନା ନାହିଁ, ତାହା ବି ଜଣାପଡ଼ିନି।
