ଆଜି ନେତାଜୀଙ୍କ ୧୨୫ତମ ଜୟନ୍ତୀ ସମ୍ମାନାର୍ଥେ ଦେଶ ପାଳିବ ‘ପରାକ୍ରମ ଦିବସ’

ନୂଆଦିଲ୍ଲୀ,୨୩ /୧ : ଆଜି ନେତାଜୀ ସୁଭାଷ ଚନ୍ଦ୍ର ବୋଷ୍‍ଙ୍କ ୧୨୫ତମ ଜୟନ୍ତୀକୁ ‘ପରାକ୍ରମ ଦିବସ’ ଭାବେ ସାରା ଦେଶରେ ପାଳନ କରାଯିବ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି କୋଲ୍‍କାତାରେ ‘ପରାକ୍ରମ ଦିବସ’ ମୁଖ୍ୟ କାର୍ଯ୍ୟକ୍ରମକୁ ଉଦ୍‍ଘାଟନ କରିବେ।ଏହି କାର୍ଯ୍ୟକ୍ରମ ବର୍ଷେ ପର୍ଯ୍ୟନ୍ତ ଚାଲିବ । ନେତାଜୀ ସୁଭାଷ ଚନ୍ଦ୍ର ବୋଷଙ୍କ ଅଦମ୍ୟ ସାହସ ଓ ନିଃସ୍ୱାର୍ଥପର ସେବାପାଇଁ ତାଙ୍କ ସମ୍ମାନାର୍ଥେ ଜାନୁୟାରୀ ୨୩ ତାରିଖ ଦିନଟିକୁ ‘ପରାକ୍ରମ ଦିବସ’ ଭାବେ ପାଳନ କରିବାକୁ ସରକାର ନିଷ୍ପତ୍ତି ନେଇଛନ୍ତି।

ନେତାଜୀଙ୍କ ଜନ୍ମସ୍ଥାନ କଟକ ଓଡ଼ିଆ ବଜାର ସ୍ଥିତ ସଂଗ୍ରହାଳୟରେ ଆୟୋଜିତ କାର୍ଯ୍ୟକ୍ରମରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଯୋଗଦେବାର କାର୍ଯ୍ୟକ୍ରମ ରହିଛି । ପ୍ରଧାନମନ୍ତ୍ରୀ କୋଲ୍‍କାତାର ନ୍ୟାସନାଲ୍‍ ଲାଇବ୍ରେରୀ ଓ ଭିକ୍ଟୋରିଆ ମେମୋରିଆଲ୍‍ଠାରେ ହେବାକୁ ଥିବା ଏହି ଉତ୍ସବରେ ଅଧ୍ୟକ୍ଷତା କରିବେ। କୋଲ୍‍କାତାରେ ପହଞ୍ଚିବା ପରେ ସେ ପ୍ରଥମେ ନ୍ୟାସନାଲ୍‍ ଲାଇବ୍ରେରୀ ଗସ୍ତ କରିବେ। ଏହାପରେ ସେ ନେତାଜୀଙ୍କ ଉପରେ ଆନ୍ତର୍ଜାତିକ ଆଲୋଚନାଚକ୍ରରେ ଉଦ୍‍ଯାପନୀ ଅଭିଭାଷଣ ଦେବେ। ଭର୍ଚୁଆଲ୍‍ ଉପାୟରେ ହେଉଥିବା ଏହି ଆଲୋଚନା ଚକ୍ରରେ ଆମେରିକା, ଜର୍ମାନୀ, ମ୍ୟାଁମାର, ଥାଇଲ୍ୟାଣ୍ଡ୍‍ ଓ ବାଂଲାଦେଶରୁ ନେତାଜୀଙ୍କ ଉପରେ ଗବେଷଣା କରୁଥିବା ପ୍ରଖ୍ୟାତ ବ୍ୟକ୍ତିମାନେ ଅଂଶଗ୍ରହଣ କରିବେ।

ଆଜି ସନ୍ଧ୍ୟାରେ ଶ୍ରୀ ମୋଦୀ ଭିକ୍ଟୋରିଆ ମେମୋରିଆଲ୍‍ଠାରେ ଏକ ପ୍ରଦର୍ଶନୀକୁ ବୁଲି ଦେଖିବେ। ୧୯୨୬ ରୁ ୧୯୩୬ ମଧ୍ୟରେ ନେତାଜୀ ଲେଖିଥିବା ଚିଠିଗୁଡ଼ିକର ଏକ ସଙ୍କଳନର ଉନ୍ମୋଚନ କରାଯିବ ଓ ଏକ ପ୍ରୋଜେକ୍ଟ ମ୍ୟାପିଂ ଶୋ’ର ଉଦ୍‍ଘାଟନ କରାଯିବ। ଏହି କାର୍ଯ୍ୟକ୍ରମରେ ଇଣ୍ଡିଆନ ନେସନାଲ ଆର୍ମିର ବରିଷ୍ଠ ସେନାନୀ ଓ ସ୍ୱାଧୀନତା ସଂଗ୍ରାମୀମାନଙ୍କୁ
ସମ୍ମାନିତ କରାଯିବ।

Comments are closed.