ନୂଆଦିଲ୍ଲୀ, ୧୯/୦୧ : : ଭାରତୀୟ ଜନତା ପାର୍ଟିର ଅଧ୍ୟକ୍ଷ ନିର୍ବାଚନ ପ୍ରକ୍ରିୟା ଆରମ୍ଭ ହୋଇଛି । ସଭାପତି ପଦ ପାଇଁ ନୀତିନ ନବୀନ ହିଁ ଏକମାତ୍ର ପ୍ରାର୍ଥୀ ଭାବେ ନାମାଙ୍କନ ଦାଖଲ କରିଛନ୍ତି । ଗୃହମନ୍ତ୍ରୀ ଅମିତ ଶାହ ଓ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ପ୍ରସ୍ତାବକ ରହି ନୀତିନଙ୍କ ନାମାଙ୍କନ ପତ୍ର ରିଟର୍ଣ୍ଣିଂ ଅଫିସର କେ.ଲକ୍ଷ୍ମଣଙ୍କୁ ପ୍ରଦାନ କରିଛନ୍ତି । ରିଟର୍ଣ୍ଣିଂ ଅଫିସରଙ୍କ ନିକଟରେ ପୃଥକ ତିନୋଟି ସେଟ୍ ଦାଖଲ କରିଛନ୍ତି । ନୀତିନ ନିଦ୍ୱନ୍ଦ୍ୱରେ ନିର୍ବାଚିତ ହେବା ଏକ ପ୍ରକାର ନିଶ୍ଚିତ ହୋଇଛି । ଅପରାହ୍ନ ୪ଟାରୁ ୫ଟା ମଧ୍ୟରେ ନାମାଙ୍କନ ପତ୍ର ଯାଞ୍ଚ ହେବ, ସନ୍ଧ୍ୟା ୫ଟାରୁ ୬ଟା ପ୍ରତ୍ୟାହାର, ଅନ୍ୟ କେହି ଯେହେତୁ ନାମାଙ୍କନ ଦାଖଲ କରିନାହାଁନ୍ତି ତେଣୁ ଆଜି ହିଁ ଆନୁଷ୍ଠାନିକ ଭାବେ ନୂଆ ଅଧ୍ୟକ୍ଷ ଭାବେ ନୀତିନ ନବୀନଙ୍କ ନାମ ଘୋଷଣା କରାଯିବ । ନୀତିନଙ୍କୁ ସଭାପତି କରିବା ଲାଗି ଦଳ ପକ୍ଷରୁ ଚୂଡାନ୍ତ ନିଷ୍ପତ୍ତି ହୋଇଥିଲା । ନୀତିନ ନବୀନ ବିହାରର ବାଙ୍କିପୁର ବିଧାନସଭା ନିର୍ବାଚନମଣ୍ଡଳୀର ବିଧାୟକ ଅଛନ୍ତି । ନୀତିନ ନବୀନ ୨୦୦୬ ମସିହାରେ ପ୍ରଥମ ଥର ପାଇଁ ପାଟନା ପଶ୍ଚିମ ବିଧାନସଭା ଆସନରୁ ବିଧାୟକ ହୋଇଥିଲେ। ସେ ୨୦୧୦ ରୁ ୨୦୨୫ ପର୍ୟ୍ୟନ୍ତ ବାଙ୍କିପୁର ଆସନରୁ ନିରନ୍ତର ଜିତି ଆସୁଛନ୍ତି। ନୀତିନ ନବୀନ ବର୍ତ୍ତମାନ ବିହାରର ଏନଡିଏ ସରକାରରେ ରାସ୍ତା ନିର୍ମାଣ ବିଭାଗ ଏବଂ ନଗର ଉନ୍ନୟନ ଏବଂ ଗୃହ ନିର୍ମାଣ ମନ୍ତ୍ରୀ ଅଛନ୍ତି। ନୀତିନ ନବୀନଙ୍କ ଜନ୍ମ ୧୯୮୦ ମସିହା ମେ ମାସରେ ଝାଡ଼ଖଣ୍ଡର ରାଞ୍ଚିରେ ହୋଇଥିଲା। ନୀତିନ ନବୀନ ୨୦୧୬ ରୁ ୨୦୧୯ ପର୍ଯ୍ୟନ୍ତ ବିଜେପି ଯୁବ ମୋର୍ଚ୍ଚାର ବିହାର ରାଜ୍ୟ ସଭାପତି ଥିଲେ। ତାଙ୍କୁ ୨୦୨୧ ମସିହାରେ ନୀତିଶ କୁମାରଙ୍କ ସରକାରରେ ପ୍ରଥମେ ମନ୍ତ୍ରୀ ଭାବରେ ନିଯୁକ୍ତ କରାଯାଇଥିଲା। “ନୀତିନ ନବୀନଙ୍କୁ କାହିଁକି ବିଜେପିର କାର୍ଯ୍ୟକାରୀ ସଭାପତି ନିଯୁକ୍ତ କରାଗଲା ତାହା ତୁରନ୍ତ ନିଶ୍ଚିତ ଭାବରେ କହିବା ସହଜ ନୁହେଁ। କିନ୍ତୁ ଏହା ନିଶ୍ଚିତ ଭାବରେ ଦର୍ଶାଉଛି ଯେ ବିଜେପିର ଶୀର୍ଷ ନେତୃତ୍ୱ ତାଙ୍କ ଉପରେ ବିଶ୍ୱାସ କରନ୍ତି।”
