ନୂଆଦିଲ୍ଲୀ, ୧୪/୦୨ : ତେଲଙ୍ଗାନାର ୧୧୬ଟି ମ୍ୟୁନିସିପାଲଟି ଓ ୭ଟି ମହାନଗର ନିଗମ ପାଇଁ ନିର୍ବାଚନ ଅନୁଷ୍ଠିତ ହୋଇଛି। ଗୁରୁବାର ଏହିସବୁ ପୌରପରିଷଦ ପାଇଁ ଭୋଟ ଗ୍ରହଣ ହୋଇଥିବାବେଳେ ଶୁକ୍ରବାର ଭୋଟ ଗଣତି ହୋଇଛି। ୧୧୬ଟି ମ୍ୟୁନିସିପାଲଟି ଅନ୍ତର୍ଗତ ୨୫୮୨ଟି ୱାର୍ଡ ମଧ୍ୟରୁ କଂଗ୍ରେସ ସର୍ବାଧିକ ୧୩୪୬ଟି ୱାର୍ଡରେ ବିଜୟୀ ହୋଇଥିବାବେଳେ ଭାରତ ରାଷ୍ଟ୍ର ସମିତି (ବିଆର୍ଏସ୍) ୭୧୪ ଓ ବିଜେପି ୨୬୧ଟି ୱାର୍ଡରେ ବିଜୟୀ ହୋଇଛି। ସ୍ବାଧୀନ ଓ ଅନ୍ୟାନ୍ୟ ଦଳ ୨୫୬ଟିରେ ବିଜୟୀ ହୋଇଛନ୍ତି। ବାଲାଟ୍ ପେପରରେ ଭୋଟ ଗ୍ରହଣ ହୋଇଥିବାରୁ ଗଣତି ପ୍ରକ୍ରିୟା ବିଳମ୍ବ ହୋଇଛି। ସର୍ବୋପରି ୧୧୬ଟି ମ୍ୟୁନିସିପାଲଟି ମଧ୍ୟରୁ କଂଗ୍ରେସ ୭୦ଟିରେ କ୍ଷମତା ଦଖଲ କରିବାକୁ ଦାବିଦାର ହୋଇଛି। ସେହିପରି ବିଆରଏସ୍ ୧୫ଟି ଓ ବିଜେପି ଗୋଟିଏରେ କ୍ଷମତା ଦଖଲ କରିବାକୁ ଦାବିଦାର ହୋଇଛି। ୩୦ଟି ମ୍ୟୁନିସିପାଲଟିରେ ସ୍ପଷ୍ଟ ଜନମତ ମିଳିପାରି ନାହିଁ। ସେହିପରି ୭ଟି ମହାନଗର ନିଗମ ମଧ୍ୟରୁ କଂଗ୍ରେସ ୪ଟିରେ ଓ ବିଜେପି ୨ଟିରେ ଆଗୁଆ ରହିଛି। ସିପିଆଇ ଗୋଟିଏର ଆଗୁଆ ରହିଛି।
