ଭଦ୍ରକ : (ଓଡିଶା ଖବର) – ପବିତ୍ର ରାମନବମୀ ଅବସରରେ ଓଡ଼ିଶା ଗ୍ରାମୀଣ ବ୍ୟାଙ୍କ୍ ଭଦ୍ରକ ୟୁନିଟ୍ର ରାମନବମୀ କମିଟି ପକ୍ଷରୁ ଏକ ବିଶାଳ ଓ ସୁସଂଗଠିତ ଖାଦ୍ୟ ପାନୀୟ ବଣ୍ଟନ କାର୍ଯ୍ୟକ୍ରମ ଭବ୍ୟ ଭାବେ ଆୟୋଜିତ ହୋଇଥିଲା। ଭଦ୍ରକ ସହରର ଏହି ସେବାମୂଳକ କାର୍ଯ୍ୟକ୍ରମରେ ଲକ୍ଷାଧିକ ଭକ୍ତଙ୍କୁ ସୁସ୍ୱାଦୁ ଖାଦ୍ୟ ଓ ଶୀତଳ ପାନୀୟ ବଣ୍ଟନ କରାଯାଇଥିଲା। ବ୍ୟାଙ୍କର ଅଧିକାରୀ ଓ କର୍ମଚାରୀମାନେ ଅତ୍ୟନ୍ତ ଶୃଙ୍ଖଳାବଦ୍ଧ, ସମନ୍ୱିତ ଓ ନିଷ୍ଠାପୂର୍ଣ୍ଣ ଭାବରେ ଏହି ବ୍ୟବସ୍ଥାକୁ ସଫଳ କରିଥିଲେ। ଭକ୍ତମାନଙ୍କ ସୁବିଧା, ପରିଷ୍କାରତା ଓ ସୁରକ୍ଷାକୁ ବିଶେଷ ଗୁରୁତ୍ୱ ଦେଇ ସମଗ୍ର ବ୍ୟବସ୍ଥାପନା କରାଯାଇଥିବାରୁ ସ୍ଥାନୀୟ ଜନସାଧାରଣଙ୍କ ମଧ୍ୟରେ ବ୍ୟାପକ ପ୍ରଶଂସା ଲାଭ କରିଛି। ବିଭିନ୍ନ ସଂଗଠନ ମଧ୍ୟରେ ଏହାକୁ ସର୍ବୋତ୍କୃଷ୍ଟ ବ୍ୟବସ୍ଥାପନା ଭାବେ ଆଲୋଚନା କରାଯାଉଛି।
ଏହା ହେଉଛି ଓଡ଼ିଶା ଗ୍ରାମୀଣ ବ୍ୟାଙ୍କ୍ ଭଦ୍ରକ ୟୁନିଟ୍ର ପକ୍ଷରୁ ତୃତୀୟ ବର୍ଷ ଧରି ଅବିରତ ଭାବେ ଆୟୋଜିତ ହେଉଥିବା ଏକ ସେବାମୂଳକ ପ୍ରୟାସ। ପ୍ରତିବର୍ଷ ଏହି କାର୍ଯ୍ୟକ୍ରମ ଆହୁରି ବ୍ୟାପକ, ସୁସଂଗଠିତ ଓ ଲୋକପ୍ରିୟ ହେଉଥିବାରୁ ଏହା ପ୍ରତି ଭକ୍ତମାନଙ୍କ ଆକର୍ଷଣ ବୃଦ୍ଧି ପାଇଛି। ଏହି ପବିତ୍ର ଅବସରରେ ବ୍ୟାଙ୍କର କର୍ମଚାରୀମାନେ ସମାଜ ସେବା, ମାନବିକତା ଓ ଧାର୍ମିକ ଏକତାର ଏକ ଉତ୍କୃଷ୍ଟ ଉଦାହରଣ ସ୍ଥାପନ କରିଛନ୍ତି, ଯାହା ଅନ୍ୟ ସଂଗଠନମାନଙ୍କ ପାଇଁ ପ୍ରେରଣାର ସୂତ୍ର ପାଲଟିଛି ।
