ଭୁବନେଶ୍ୱର, ୦୯/୦୬ : ମୁଖ୍ୟମନ୍ତ୍ରୀ ଶ୍ରୀ ମୋହନ ଚରଣ ମାଝୀଙ୍କ ଅଧ୍ୟକ୍ଷତାରେ ଏକ ଗୁରୁତ୍ୱପୂର୍ଣ୍ଣ କ୍ୟାବିନେଟ୍ ବୈଠକ ଅନୁଷ୍ଠିତ ହୋଇଯାଇଛି। ଲୋକସେବା ଭବନ ସମ୍ମିଳନୀ କକ୍ଷରେ ଆୟୋଜିତ ଏହି ୪୧ତମ ମନ୍ତ୍ରୀମଣ୍ଡଳ ବୈଠକରେ ୫ଟି ପ୍ରମୁଖ ବିଭାଗର ୧୦ଟି ଗୁରୁତ୍ୱପୂର୍ଣ୍ଣ ପ୍ରସ୍ତାବକୁ ସବୁଜ ସଙ୍କେତ ମିଳିଛି। ବୈଠକ ଶେଷ ହେବା ପରେ ମୁଖ୍ୟ ଶାସନ ସଚିବ ଶ୍ରୀମତୀ ଅନୁ ଗର୍ଗ ଗଣମାଧ୍ୟମକୁ ଏହି ନିଷ୍ପତ୍ତି ସମ୍ପର୍କରେ ସୂଚନା ଦେଇଛନ୍ତି। ଅନୁମୋଦିତ ପ୍ରସ୍ତାବଗୁଡ଼ିକ ମଧ୍ୟରେ ଗୃହ ଓ ନଗର ଉନ୍ନୟନ ବିଭାଗର ୪ଟି, ଶିଳ୍ପ ବିଭାଗର ୨ଟି, ଜଳ ସମ୍ପଦ ବିଭାଗର ୨ଟି, ରାଜସ୍ୱ ବିଭାଗର ୧ଟି ଏବଂ ପର୍ଯ୍ୟଟନ ବିଭାଗର ୧ଟି ପ୍ରସ୍ତାବ ସାମିଲ ରହିଛି।
ରାଜ୍ୟର ପ୍ରମୁଖ ସହରଗୁଡ଼ିକରେ ଥିବା ନଦୀପଠା ଓ ଜଳାଶୟଗୁଡ଼ିକର କାୟାକଳ୍ପ ବଦଳାଇବା ପାଇଁ କ୍ୟାବିନେଟ୍ ‘ସହରାଞ୍ଚଳ ଜଳ ତଟ ବିକାଶ ଯୋଜନା’ କୁ ମଞ୍ଜୁରୀ ଦେଇଛନ୍ତି। ଏଥିପାଇଁ ୫୦୦ କୋଟି ଟଙ୍କାର ବଜେଟ୍ ବ୍ୟବସ୍ଥା କରାଯାଇଛି। ଏହି ଯୋଜନା ଅଧୀନରେ ସମ୍ବଲପୁର ଓ କଟକର ମହାନଦୀ ପଠା, ଭୁବନେଶ୍ୱରର ଦୟା ଓ ଗଙ୍ଗୁଆ ନଦୀ, ରାଉରକେଲାର ବେଦବ୍ୟାସ ସ୍ଥିତ ବ୍ରାହ୍ମଣୀ ନଦୀ ତଟର ସୌନ୍ଦର୍ଯ୍ୟକରଣ ଓ ବିକାଶ କରାଯିବ।ରାଜଧାନୀବାସୀଙ୍କୁ ସ୍ୱଚ୍ଛ ପାନୀୟ ଜଳ ଯୋଗାଇବା ପାଇଁ ଭୁବନେଶ୍ୱର TP-1, 2 ଏବଂ 3 ଅଞ୍ଚଳରେ ୨୪ ଘଣ୍ଟିଆ ଜଳ ଯୋଗାଣ ପ୍ରକଳ୍ପ ଉପରେ ମୋହର ବାଜିଛି। ଏହି ପ୍ରକଳ୍ପ ପାଇଁ ୧୧୨.୩୧ କୋଟି ଟଙ୍କା ଖର୍ଚ୍ଚ କରାଯିବ। ଏହାସହ ଭୁବନେଶ୍ୱର ଦେଇ ପ୍ରବାହିତ ଗଙ୍ଗୁଆ ନାଳର ଜଳ ବିଶୋଧନ ପାଇଁ ୧୦୮.୯ କୋଟି ଟଙ୍କାର ବ୍ୟୟବରାଦକୁ କ୍ୟାବିନେଟ ଅନୁମୋଦନ କରିଛି।
ବୃତଙ୍ଗ ପ୍ରକଳ୍ପ: ନୟାଗଡ଼ ଜିଲ୍ଲାର ବହୁ ପ୍ରତିକ୍ଷୀତ ବୃତଙ୍ଗ ଜଳସେଚନ ପ୍ରକଳ୍ପ ପାଇଁ ୧୯୪ କୋଟି ଟଙ୍କାର ଅନୁଦାନକୁ ମଞ୍ଜୁରୀ ମିଳିଛି, ଯାହା ସ୍ଥାନୀୟ ଚାଷୀଙ୍କ ପାଇଁ ବଡ଼ ଆଶ୍ୱସ୍ତି ଆଣିଦେବ।
ଆୟୋଧ୍ୟା ସାଗର ପ୍ରକଳ୍ପ: ସମ୍ବଲପୁରର ମହାନଦୀ ଆୟୋଧ୍ୟା ସାଗର ଜଳାଶୟ ପ୍ରକଳ୍ପ ପାଇଁ ୪୪୦.୩୩ କୋଟି ଟଙ୍କା ମଞ୍ଜୁର ହୋଇଛି। ଏହି ପ୍ରକଳ୍ପ ଦ୍ୱାରା ପାନୀୟ ଜଳ ସମସ୍ୟାର ସମାଧାନ ହେବା ସହ ପର୍ଯ୍ୟଟନର ବିକାଶ ଏବଂ ପ୍ରସିଦ୍ଧ ସମଲେଶ୍ଵରୀ ମନ୍ଦିର ନିକଟରେ ଏକ ଭବ୍ୟ ଆଳତି ଘାଟ ନିର୍ମାଣ କରାଯିବ।
୨୦୪୭ ସୁଦ୍ଧା ପର୍ଯ୍ୟଟନ କ୍ଷେତ୍ରରେ ମିଳିବ ୨୫ ହଜାର ନୂଆ ରୁମ୍
ରାଜ୍ୟରେ ପର୍ଯ୍ୟଟନ ଶିଳ୍ପର ବିକାଶ ପାଇଁ ସରକାର ଏକ ବଡ଼ ଲକ୍ଷ୍ୟ ଧାର୍ଯ୍ୟ କରିଛନ୍ତି। ୨୦୪୭ ମସିହା ସୁଦ୍ଧା ଓଡ଼ିଶାର ବିଭିନ୍ନ ପର୍ଯ୍ୟଟନ ସ୍ଥଳୀରେ ୨୫,୦୦୦ ନୂଆ ରୁମ୍ ନିର୍ମାଣ କରାଯିବ। ଏଥିପାଇଁ ପ୍ରମୁଖ ପର୍ଯ୍ୟଟନ ସ୍ଥଳଗୁଡ଼ିକରେ ବେସରକାରୀ ସହଭାଗିତାରେ ତାରକା ହୋଟେଲ (Star Hotels) ନିର୍ମାଣ କରିବାକୁ କ୍ୟାବିନେଟ୍ ସବୁଜ ସଙ୍କେତ ଦେଇଛନ୍ତି।ରାଜ୍ୟ ମନ୍ତ୍ରୀମଣ୍ଡଳର ଏହି ସମସ୍ତ ନିଷ୍ପତ୍ତି ଓଡ଼ିଶାର ଭିତ୍ତିଭୂମି, ପର୍ଯ୍ୟଟନ ଏବଂ ସହରାଞ୍ଚଳ ବିକାଶକୁ ଏକ ନୂଆ ଦିଗ ଦେବ ବୋଲି ଆଶା କରାଯାଉଛି।
