ନୂଆଦିଲ୍ଲୀ : ଭାରତରେ ହୃଦ୍ରୋଗୀଙ୍କ ସଂଖ୍ୟା ବଢ଼ିବାରେ ଲାଗିଛି। ଯୁବବର୍ଗ ଓ ସେଲିବ୍ରିଟିଙ୍କ ମଧ୍ୟରେ ହୃଦଘାତର ମାତ୍ରା ବଢ଼ିଛି। ସେହି ଅନୁଯାୟୀ ଗତ ୫ ବର୍ଷ ମଧ୍ୟରେ ହୃଦରୋଗ ଔଷଧ ବିକ୍ରି ମଧ୍ୟ ୫୦ ପ୍ରତିଶତ ବୃଦ୍ଧିପାଇଛି। ଗ୍ୟାଷ୍ଟ୍ରୋ-ଇଣ୍ଟେଷ୍ଟିନାଲ୍ ଟ୍ରାକ୍ଟ, ସଂକ୍ରମଣ କିମ୍ବା ମଧୁମେହ ସମେତ ଯେକୌଣସି ଜଟିଳତା ପାଇଁ ଉଦ୍ଦିଷ୍ଟ ଔଷଧ ଅପେକ୍ଷା ହୃଦ୍ରୋଗ ଔଷଧ ଅଧିକ ବିକ୍ରି ହେଉଛି।
ସାଧାରଣ ଲୋକଙ୍କ ସହିତ ସେଲିବ୍ରିଟି ଏବଂ ଅତ୍ୟଧିକ ବ୍ୟାୟାମ କରୁଥିବା ଲୋକଙ୍କ ମଧ୍ୟରେ ହୃଦ୍ଘାତରେ ମୃତ୍ୟୁ ସଂଖ୍ୟା ବୃଦ୍ଧିପାଉଛି। ଏହାର ପ୍ରମୁଖ କାରଣ ଜୀବନଶୈଳୀରେ ପରିବର୍ତ୍ତନ, ଚାପ ଏବଂ ଖାଦ୍ୟ ଅଭ୍ୟାସ। ସେହିପରି ବୟସ୍କଙ୍କ ମଧ୍ୟରେ ହୃଦ୍ରୋଗ ଆଶଙ୍କା ଅଧିକ ଥାଏ। ବରିଷ୍ଠ ହୃଦ୍ରୋଗ ବିଶେଷଜ୍ଞ ଡା ଅକ୍ଷୟ ମେହେଟା କହିଛନ୍ତି, ‘ଭାରତୀୟ ଜନସଂଖ୍ୟାର ଆୟୁଷ ବୃଦ୍ଧି ପାଇଛି ଏବଂ ବର୍ଦ୍ଧିତ ବୟସ୍କ ଜନସଂଖ୍ୟା ସହିତ ହୃଦ୍ରୋଗୀଙ୍କ ସଂଖ୍ୟା ବଢ଼ୁଛି। ରୋଗ ବଢ଼ିବା ସହ ସଚେତନତା ବଢ଼ୁଥିବାରୁ ଔଷଧ ବିକ୍ରି ମଧ୍ୟ ବଢ଼ିଛି। ଔଷଧ ବିକ୍ରିରେ ଅଧାରୁ ଅଧିକ ଅଂଶ ଥିବା ୧୭ଟି ପ୍ରମୁଖ ଭାରତୀୟ ଔଷଧ କମ୍ପାନୀର ବିକ୍ରୟ ସଂଖ୍ୟା ବିଶ୍ଳେଷଣ କରୁଥିବା ଫାର୍ମାୠାକ୍ର ଜୁନ୍ ରିପୋର୍ଟ ଅନୁସାରେ; ୨୦୨୧ ଜୁନ୍ରେ ହୃଦ୍ରୋଗ ଔଷଧ ବିକ୍ରି ୧,୭୬୧ କୋଟି ଟଙ୍କାରୁ ବୃଦ୍ଧି ପାଇ ୨୦୨୫ ଜୁନ୍ ସୁଦ୍ଧା ୨,୬୪୫ କୋଟି ଟଙ୍କାରେ ପହଞ୍ଚିଛି। ଏହି କ୍ଷେତ୍ରରେ ବାର୍ଷିକ ୧୦.୭% ବୃଦ୍ଧି ହୋଇଛି। ବିଶେଷଜ୍ଞ ଏହି ବୃଦ୍ଧି ପାଇଁ ଅନେକ କାରଣ ପ୍ରଦାନ କରିଛନ୍ତି, ଯଥା ହୃଦ୍ରୋଗ ବିଷୟରେ ବଢ଼ୁଥିବା ସଚେତନତା, ଉଚ୍ଚ ରକ୍ତଚାପ ମାପିବା ପାଇଁ ନୂତନ ପାରାମିଟର ଏବଂ ବରିଷ୍ଠ ନାଗରିକଙ୍କ ଜନସଂଖ୍ୟା ବୃଦ୍ଧି। ଏଥିରେ କୌଣସି ସନ୍ଦେହ ନାହିଁ ଯେ ହୃଦ୍ରୋଗ ବୃଦ୍ଧି ପାଉଛି, କିନ୍ତୁ ସେହି ଅନୁଯାୟୀ ଯତ୍ନ ଏବଂ ରୋଗ ନିର୍ଣ୍ଣୟ ଉପକରଣର ଉପଲବ୍ଧତାରେ ଉନ୍ନତି ଘଟିଛି। କେନ୍ଦ୍ରର ତଥ୍ୟ ଅନୁଯାୟୀ , ଦେଶରେ ମୋଟ ମୃତ୍ୟୁର ୬୩% ଅଣ-ସଂକ୍ରମିତ ରୋଗ ଯୋଗୁଁ ହୋଇଥିଲା, ଯେଉଁଥିରେ ହୃଦ୍ରୋଗରେ ୨୭% ଲୋକଙ୍କ ମୃତ୍ୟୁ ହୋଇଥିଲା।
