ମୁମ୍ବାଇ,୧୩ /୬ : ମହାରାଷ୍ଟ୍ରରେ ମୁଖ୍ୟମନ୍ତ୍ରୀ ହେବାକୁ କଂଗ୍ରେସ ନେତା ଆଶା କରିଥିବା ଖବର ପ୍ରକାଶ ପାଇବା ପରେ ଶିବସେନା ନେତା ସଞ୍ଜୟ ରାଉତ କହିଛନ୍ତି ଯେ ଅଢେଇ ବର୍ଷ ପରେ ଶିବସେନାର ମୁଖ୍ୟମନ୍ତ୍ରୀ ପରିବର୍ତ୍ତନ ହେବା କଥା ସମ୍ପୂର୍ଣ୍ଣ ଗୁଜବ। ସେ କହିଛନ୍ତି ଯେ ଯେତେବେଳେ ତିନି ଦଳ ଏକାଠି ସରକାର ଗଠନ କରିଥିଲେ, ସେତେବେଳେ ସେମାନେ ନିଷ୍ପତ୍ତି ନେଇଥିଲେ ଯେ ଉଦ୍ଧବ ଠାକରେ ୫ ବର୍ଷ ପାଇଁ ମୁଖ୍ୟମନ୍ତ୍ରୀ ହେବେ। ବର୍ତ୍ତମାନ ଯଦି କେହି ଏ ବିଷୟରେ କଥାବାର୍ତ୍ତା କରନ୍ତି, ତେବେ ଏହା ମିଥ୍ୟା ଏବଂ ଗୁଜବ ବ୍ୟତୀତ ଆଉ କିଛି ନୁହେଁ |
ମହାରାଷ୍ଟ୍ର କଂଗ୍ରେସ ସଭାପତି ନାନା ପାଟୋଲ ଇସାରାରେ ମୁଖ୍ୟମନ୍ତ୍ରୀ ହେବାକୁ ଇଚ୍ଛା ପ୍ରକାଶ କରିଥିଲେ। ସେ ଏକ ବୈଠକରେ କହିଛନ୍ତି ଯେ କର୍ମୀମାନେ ମୁଁ ମୁଖ୍ୟମନ୍ତ୍ରୀ ହୁଏ ବୋଲି ଚାହୁଁଛନ୍ତି। ତେବେ ତାଙ୍କ ବିବୃତ୍ତିକୁ ନେଇ ଏନସିପି ନେତା ନବାବ ମଲିକ କହିଛନ୍ତି ଯେ ସମସ୍ତଙ୍କର ସ୍ୱପ୍ନ ଦେଖିବାର ଅଧିକାର ରହିଛି। ସଞ୍ଜୟ ରାଉତ କହିଛନ୍ତି, “ଏହା ମିଶ୍ରଣ ନୁହେଁ, ବରଂ ୩ଟି ଦଳର ଏକ ମିଳିତ ମଞ୍ଚ ଏବଂ ସମସ୍ତେ ନିଜ ଦଳର ସମ୍ପ୍ରସାରଣ କିମ୍ବା ମଜବୁତ କରିବାକୁ ମୁକ୍ତ ଅଟନ୍ତି। ପ୍ରତ୍ୟେକ ନିର୍ବାଚନରେ ଏକାଠି ଲଢ଼ିବା ପାଇଁ ଆମର କୌଣସି ପ୍ରତିବଦ୍ଧତା ନାହିଁ। ସ୍ଥାନୀୟ ନିର୍ବାଚନରେ ସ୍ଥାନୀୟ ନେତାମାନେ ନିଷ୍ପତ୍ତି ନିଅନ୍ତି’।
