ଭୁବନେଶ୍ୱର,୪/୮: ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନିର୍ଦ୍ଦେଶ ଅନୁଯାୟୀ ମୁଖ୍ୟ ଶାସନ ସଚିବ ସୁରେଶ ଚନ୍ଦ୍ର ମହାପାତ୍ର, ଜଳ ସମ୍ପଦ ବିଭାଗ ମୁଖ୍ୟ ସଚିବ ଅନୁ ଗର୍ଗ, ଏନ୍ଏଚ୍ଏମ୍ ମିଶନ୍ ନିର୍ଦ୍ଦେଶକ ଶାଲିନୀ ପଣ୍ଡିତ ଓ ୫- ଟି ସଚିବ ଭି.କେ. ପାଣ୍ଡିଆନ ଆଜି ବଲାଙ୍ଗୀର ଜିଲ୍ଲା ପରିଦର୍ଶନ କରି ବିଭିନ୍ନ ବିକାଶମୂଳକ ପ୍ରକଳ୍ପର ସମୀକ୍ଷା କରିଛନ୍ତି । ଏବେ ଜିଲ୍ଲାର ଜାରି ରହିଥିବା ପ୍ରକଳ୍ପ କାର୍ଯ୍ୟ ଶୀଘ୍ର ଶେଷ କରିବାକୁ ନିର୍ଦ୍ଦେଶ ଦେଇଛନ୍ତି।
ଏହି ଉଚ୍ଚସ୍ତରୀୟ ଅନୁଧ୍ୟାନକାରୀ ଦଳ ଦେଓଗାଁ ପଞ୍ଚାୟତ ସମିତି ଉଚ୍ଚ ବିଦ୍ୟାଳୟ, ବାଲାଙ୍ଗୀର ପିପି ଏକାଡେମୀ ଏବଂ ବିଭିନ୍ନ ବିଦ୍ୟାଳୟ ଅପ-ଗ୍ରେଡେସନ୍ ପ୍ରକଳ୍ପ ଯାଞ୍ଚ କରିଥିଲେ। ସେମାନେ ଛାତ୍ର, ଶିକ୍ଷକ ଏବଂ ପୁରାତନ ଛାତ୍ରଛାତ୍ରୀଙ୍କ ସହିତ ମଧ୍ୟ କଥାବାର୍ତ୍ତା କରିଥିଲେ। ବଲାଙ୍ଗୀର ଜିଲ୍ଲାର ପ୍ରାୟ ୨୪ଟି ଉଚ୍ଚ ବିଦ୍ୟାଳୟରେ ସ୍ମାର୍ଟ କ୍ଲାସ୍ ରୁମ୍, ସାଇନ୍ସ ଲାବୋରେଟୋରୀ, ଇ-ଲାଇବ୍ରେରୀ ଏବଂ ଅନ୍ୟାନ୍ୟ ଉନ୍ନତ ସୁବିଧା ଭଳି ଆଧୁନିକ ସୁବିଧା ଖୁବ ଶୀଘ୍ର ଉପଲବ୍ଧ ହେବ। ଏହି ବିଦ୍ୟାଳୟଗୁଡିକ ଫାଇଭ ଟି ଯୋଜନା ମୁତାବକ କାର୍ଯ୍ୟ କରୁଛନ୍ତି। ଏହି ଦଳ ପାଥର୍ସେପାସ୍ଥିତ ଆଦର୍ଶ ବିଦ୍ୟାଳୟ ପରିଦର୍ଶନ କରି ଗତ କିଛି ବର୍ଷ ଧରି ବିଦ୍ୟାଳୟର ପ୍ରଦର୍ଶନକୁ ପ୍ରଶଂସା କରିଥିଲେ।
ଏହି ଅବସରରେ ଭୀମଭୋଇ ମେଡିକାଲ କଲେଜ ଏବଂ ହସ୍ପିଟାଲ ପରିଦର୍ଶନ କରି ଅଧିକାରୀମାନେ ସମସ୍ତ ପ୍ରକଳ୍ପରେ କାର୍ଯ୍ୟର ଗୁଣବତ୍ତା ନିଶ୍ଚିତ କରିବାକୁ କହିଥିଲେ। ସେମାନେ ତରଳ ମେଡିକାଲ ଅମ୍ଳଜାନ କାରଖାନା ଏବଂ ପିଏସଏ ପ୍ଲାଣ୍ଟ ନିର୍ମାଣର ଅଗ୍ରଗତି ସମୀକ୍ଷା କରିଥିଲେ ଏବଂ ନିର୍ମାଣାଧୀନ ଆଟେଣ୍ଡାଣ୍ଟ ରେଷ୍ଟ ଶେଡ, ଆହାର କେନ୍ଦ୍ର, କୋଭିଡ ୱାର୍ଡ ପ୍ରସ୍ତୁତି, ଶିଶୁ ଆଇସିୟୁ ସୁବିଧା ଏବଂ ଅମ୍ଳଜାନ ଯୋଗାଣ ବ୍ୟବସ୍ତା ପରିଦର୍ଶନ କରିଥିଲେ।
ଏହି ଟିମ୍ ଗୁରୁତ୍ୱପୂର୍ଣ୍ଣ ଲୋୟର ସୁକେଲ୍ ଜଳସେଚନ ପ୍ରକଳ୍ପ ସ୍ଥାନ ପରିଦର୍ଶନ କରି ଡ୍ୟାମ୍ ଏବଂ ସ୍ପିଲୱେ ନିର୍ମାଣର ଅଗ୍ରଗତି ସମୀକ୍ଷା କରିଛନ୍ତି। ୨୦୧୨ ଜୁନ୍ ସୁଦ୍ଧା ସ୍ପିଲୱେ ପାଇଁ କାର୍ଯ୍ୟ ସମାପ୍ତ କରିବାକୁ ଏହି ଉଚ୍ଚସ୍ତରୀୟ ଦଳ ନିର୍ଦ୍ଦେଶ ଦେଇଛନ୍ତି। ଏହା ବ୍ୟତୀତ ଏହି ଉଚ୍ଚସ୍ତରୀୟ ଟିମ୍ ସାଇନ୍ସ ପାର୍କ ଏବଂ ପ୍ଲାନେଟେରିୟମ୍, ନୂଆ ବସ୍ ଟର୍ମିନାଲ୍, ବାଲାଙ୍ଗୀର ବାଇ-ପାସ୍, ମହାରାଣୀ ସାଗର ଟ୍ୟାଙ୍କ ଏବଂ ବିଭିନ୍ନ ପାନୀୟ ଜଳ, ବିଦ୍ୟୁତ୍ ଏବଂ ଅନ୍ୟାନ୍ୟ ଜଳସେଚନ ପ୍ରକଳ୍ପର ଅଗ୍ରଗତି ସମୀକ୍ଷା କରିଛନ୍ତି। ଜିଲ୍ଲା ବଲାଙ୍ଗୀର ବାଇପାସ୍ ପାଇଁ ଜମି ଅଧିଗ୍ରହଣ ପ୍ରକ୍ରିୟାକୁ ତ୍ୱରାନ୍ୱିତ କରିବାକୁ ଦଳ ନିର୍ଦ୍ଦେଶ ଦେଇଛନ୍ତି।
