ଚଣ୍ଡିଗଡ : ଶେଷରେ ଖଲିସ୍ତାନୀ ବିଚ୍ଛିନ୍ନତାବାଦୀ ଅମୃତପାଲ୍ ସିଂ ପୁଲିସ ନିକଟରେ ଆତ୍ମସମର୍ପଣ କରିଛି। ଅମୃତପାଲ୍ ସିଂହ ପଞ୍ଜାବର ମୋଗା ପୁଲିସ ନିକଟରେ ଆତ୍ମସମର୍ପଣ କରିଥିବା କଥା ବିଶେଷସୂତ୍ରରୁ ଜଣାପଡ଼ିଛି। ଅନ୍ୟ ଏକ ରିପୋର୍ଟ ଅନୁସାରେ, ମୋଗା ପୁଲିସ ଅମୃତପାଲ୍ ସିଂହଙ୍କୁ ଗିରଫ କରିଥିଲେ ବି ଘଟଣା ସଂକ୍ରାନ୍ତରେ ଏପର୍ଯ୍ୟନ୍ତ ସୂଚନା ଦିଆଯାଇନାହିଁ।
ସୂଚନାଯୋଗ୍ୟ, ଫେବ୍ରୁଆରି ୨୪ ତାରିଖରେ ଅମୃତପାଲ୍ ସିଂହ ଓ ତାଙ୍କ ସମର୍ଥକମାନେ ଖଣ୍ଡା, ବନ୍ଧୁକ ଆଦି ଅସ୍ତ୍ରଶସ୍ତ୍ର ଧରି ବାରିକେଡ୍ ଭାଙ୍ଗି ବଳପୂର୍ବକ ଅମୃତସର ନଗରୀ ଉପକଣ୍ଠରେ ଅବସ୍ଥିତ ଅଜ୍ନାଲା ଥାନାରେ ପ୍ରବେଶ କରିଥିଲେ। ତା’ପରେ ସେମାନେ ସେମାନଙ୍କର ଅନ୍ୟତମ ସହଯୋଗୀ ତଥା ଅପହରଣକାରୀ ଅଭିଯୁକ୍ତ ଲଭ୍ପ୍ରୀତ୍ ସିଂହ ତୁଫାନ୍ଙ୍କୁ ମୁକ୍ତ କରାଯିବ ବୋଲି ପୁଲିସଠାରୁ ପ୍ରତିଶ୍ରୁତି ପତ୍ର ଆଦାୟ କରି ନେଇଥିଲେ। ସେମାନଙ୍କ ସହିତ ସଂଘର୍ଷ କରି ୬ଜଣ ପୁଲିସ କର୍ମଚାରୀ ମଧ୍ୟ ଆହତ ହୋଇଥିଲେ।
ଅଜନାଲା କାଣ୍ଡ ପରଠୁ ଫେରାର ଥିଲା ଅମୃତପାଲ ସିଂ । ୩୬ ଦିନ ଧରି ଗାୟବ ଥିଲା ଅମୃତପାଲ । ଉତ୍ତରପ୍ରଦେଶର ଲଖିମପୁର ଖେରୀ ରାସ୍ତା ଦେଇ ନେପାଳ ଖସିଯାଇଥିବା ଚର୍ଚ୍ଚା ହେଉଥିଲା । ଏଥିପାଇଁ ପଞ୍ଜାବ, ହରିୟାଣା, ଦିଲ୍ଲୀ, ଉତ୍ତରାଖଣ୍ଡ ପରେ ନେପାଳରେ ଅମୃତପାଲ ସିଂକୁ ଖୋଜା ଚାଲିଥିଲା । ୨୦ ମାର୍ଚ୍ଚରେ ଅମୃତପାଲ ହରିୟାଣାରେ ଥିବା ସ୍ପଷ୍ଟ ହୋଇଥିଲା । ପରେ ପରେ ୨୩ ମାର୍ଚ୍ଚରେ ଲଖିମପୁରରେ ମଧ୍ୟ ଅମୃତପାଲ ଟୋପି ପିନ୍ଧି ବୁଲୁଥିବା ଫଟୋ ଭାଇରାଲ ହେଉଥିଲା । ସବୁ ଚର୍ଚ୍ଚାର ଅନ୍ତ ଘଟାଇ ଅମୃତପାଲ ସରେଣ୍ଡର କରିଥିବା ବେଳେ ପୁଲିସ ତାକୁ ଗିରଫ କରିଛି । ଅମୃତପାଲ ସିଂ ଜଣେ ଖଲିସ୍ଥାନୀ ନେତା । ଓ୍ୱାରିସ ପଞ୍ଜାବ ଦେ ନାମକ ଏକ ସଂଗଠନର ମୁଖିଆ ହେଉଛି ଅମୃତପାଲ ।
