ମୁମ୍ବାଇ : ଅଳ୍ପ କିଛିଦିନ ମଧ୍ୟରେ ଅନେକ ଷ୍ଟାର-କିଡ଼ସ ବଲିଉଡରେ ନିଜର କ୍ୟାରିୟର ତିଆରି କରିଛନ୍ତି । ସେମାନଙ୍କ ମଧ୍ୟରୁ ଜଣେ ହେଉଛନ୍ତି ସ୍ୱର୍ଗତ ଅଭିନେତ୍ରୀ ଶ୍ରୀଦେବୀ ଏବଂ ନିର୍ମାତା-ନିର୍ଦ୍ଦେଶକ ବୋନି କପୁରଙ୍କ ଝିଅ ଜାହ୍ନବୀ କପୁର । ଜାହ୍ନବୀ ଖୁବ୍ କମ୍ ସମୟ ମଧ୍ୟରେ ଏକ ବଡ ନାମ ହାସଲ କରିଛନ୍ତି ।
ବର୍ତ୍ତମାନ ଖବର ଆସିଛି ଯେ ଶ୍ରୀଦେବୀଙ୍କ ସାନ ଝିଅ ଖୁସି କପୁର ମଧ୍ୟ ଖୁବ ଶୀଘ୍ର ବଲିଉଡରେ ପାଦ ଦେବାକୁ ଯାଉଛନ୍ତି। ଖୁସି ମଧ୍ୟ ଅଭିନୟରେ କ୍ୟାରିୟର କରିବାକୁ ଚାହୁଁଛନ୍ତି। ଖୁସୀ ଲୋକପ୍ରିୟ ଷ୍ଟାର-କିଡ଼ସ ମଧ୍ୟରୁ ଅନ୍ୟତମ ଏବଂ ସେ ସୋସିଆଲ ମିଡିଆରେ ମଧ୍ୟ ବହୁତ ସକ୍ରିୟ । ଜାହ୍ନବୀଙ୍କ ଅପେକ୍ଷା ଖୁସିଙ୍କୁ ଅଧିକ ଗ୍ଲାମରସ୍ ବୋଲି ବିବେଚନା କରାଯାଏ ।
ଖୁସିଙ୍କ ବଲିଉଡ ଡେବ୍ୟୁକୁ ନେଇ ବୋନି କପୁର ମଧ୍ୟ ନିଶ୍ଚିତ କରିଛନ୍ତି। ଟାଇମ୍ସ ଅଫ୍ ଇଣ୍ଡିଆ ଅନୁଯାୟୀ ବୋନି କହିଛନ୍ତି ଯେ, ହଁ ଖୁସି ଅଭିନୟ କରିବାକୁ ଚାହୁଁଛନ୍ତି ଏବଂ ଆପଣ ଶୀଘ୍ର ଏକ ଘୋଷଣା ଶୁଣିପାରିବେ। ତେବେ ବୋନି ନିଜ ଝିଅକୁ ନିଜେ ଲଞ୍ଚ କରିବେ ନାହିଁ ବୋଲି ସେ ସ୍ପଷ୍ଟ କରିଛନ୍ତି।
ବୋନି କହିଛନ୍ତି, ମୋର ସମ୍ବଳ ଅଛି, କିନ୍ତୁ ମୁଁ ଚାହୁଁଛି ଯେ ଖୁସିଙ୍କୁ ଅନ୍ୟ କେହି ଲଞ୍ଚ କରନ୍ତୁ, ନଚେତ୍ ଏହା ପକ୍ଷପାତିତା ହେବ । ଆପଣ ଚଳଚ୍ଚିତ୍ର ନିର୍ମାତା ଭାବରେ ଏହା କରିପାରିବେ ନାହିଁ ଏବଂ ଏହା ଜଣେ କଳାକାରଙ୍କ ପାଇଁ ମଧ୍ୟ ଭଲ ନୁହେଁ ।
ସୂଚନାଯୋଗ୍ୟ ଯେ ବୋନି କପୁରଙ୍କ ଦୁଇ ସନ୍ତାନ ଅର୍ଜୁନ କପୁର ଏବଂ ଜାହ୍ନବୀ କପୁର ପୂର୍ବରୁ ବଲିଉଡରେ ପାଦ ଦେଇ ସାରିଛନ୍ତି। ଏହି ଦୁଇଜଣଙ୍କୁ ବୋନି କପୁର ନୁହେଁ ଅନ୍ୟ ନିର୍ମାତା ଏବଂ ନିର୍ଦ୍ଦେଶକଙ୍କ ଦ୍ୱାରା ଲଞ୍ଚ କରାଯାଇଥିଲା। କୁହାଯାଉଛି ଯେ ଚଳଚ୍ଚିତ୍ର ନିର୍ମାତା-ନିର୍ଦ୍ଦେଶକ କରଣ ଜୋହର ଖୁସିଙ୍କୁ ଲଞ୍ଚ କରିପାରନ୍ତି କାରଣ ଖୁସି ମଧ୍ୟ ତାଙ୍କ ସହ ଅନେକ ଥର କାମ କରିବାକୁ ଇଚ୍ଛା ପ୍ରକାଶ କରିଛନ୍ତି।
