ନୂଆଦିଲ୍ଲୀ : ଭାରତୀୟ ସଙ୍ଗୀତ ଜଗତର ଅନନ୍ୟ ପ୍ରତିଭା ତଥା ବିଶିଷ୍ଟ ଗାୟିକା ଏସ୍ ଜାନକୀଙ୍କ ଶନିବାର ପରଲୋକ ଘଟିଛି। ମୃତ୍ୟୁ ବେଳକୁ ତାଙ୍କୁ ୮୮ ବର୍ଷ ବୟସ ହୋଇଥିଲା। କର୍ଣ୍ଣାଟକର ମହିଶୂରଠାରେ ସେ ଶେଷ ନିଶ୍ୱାସ ତ୍ୟାଗ କରିଛନ୍ତି। ସଙ୍ଗୀତ ଦୁନିଆରେ ‘ଦକ୍ଷିଣ ଭାରତର କୋକିଳକଣ୍ଠୀ’ (ନାଇଟିଙ୍ଗେଲ୍ ଅଫ୍ ସାଉଥ୍ ଇଣ୍ଡିଆ) ଏବଂ ଶ୍ରଦ୍ଧାରେ ‘ଜାନକୀ ଆମ୍ମା’ ଭାବେ ପରିଚିତ ଏହି ମହାନ କଣ୍ଠଶିଳ୍ପୀଙ୍କ ବିୟୋଗରେ ଦେଶର କଳା ଓ ସାଂସ୍କୃତିକ ଜଗତରେ ଗଭୀର ଶୋକ ପ୍ରକାଶ ପାଇଛି। ସେ ନିଜର ସୁଦୀର୍ଘ ସଙ୍ଗୀତ କ୍ୟାରିୟର ମଧ୍ୟରେ ୪ଟି ଜାତୀୟ ଚଳଚ୍ଚିତ୍ର ପୁରସ୍କାର ଏବଂ ବିଭିନ୍ନ ରାଜ୍ୟର ୩୩ଟି ଚଳଚ୍ଚିତ୍ର ପୁରସ୍କାର ଲାଭ କରିଥିଲେ।
ସଙ୍ଗୀତ ପ୍ରତି ଅତୁଳନୀୟ ଅବଦାନ ରଖିଥିବା ଏସ୍. ଜାନକୀ ସ୍ପଷ୍ଟବାଦିତା ପାଇଁ ମଧ୍ୟ ଚର୍ଚ୍ଚାରେ ଥିଲେ। ଗତ ୨୦୧୩ ମସିହାରେ କେନ୍ଦ୍ର ସରକାର ତାଙ୍କୁ ଦେଶର ତୃତୀୟ ସର୍ବୋଚ୍ଚ ବେସାମରିକ ସମ୍ମାନ ‘ପଦ୍ମଭୂଷଣ’ ପ୍ରଦାନ କରିବାକୁ ଘୋଷଣା କରିଥିଲେ ମଧ୍ୟ ସେ ଏହାକୁ ପ୍ରତ୍ୟାଖ୍ୟାନ କରିଥିଲେ। ସଙ୍ଗୀତ କ୍ଷେତ୍ରରେ ତାଙ୍କର ବ୍ୟାପକ ସେବା ପାଇଁ ସେ ଦେଶର ସର୍ବୋଚ୍ଚ ସମ୍ମାନ ‘ଭାରତ ରତ୍ନ’ ପାଇବାକୁ ଯୋଗ୍ୟ ବୋଲି ପ୍ରକାଶ କରିବା ସହ ଏହି ସ୍ୱୀକୃତି ବହୁ ପୂର୍ବରୁ ମିଳିବାର ଥିଲା ବୋଲି ସେ ମତ ଦେଇଥିଲେ।
ଏସ୍ ଜାନକୀ ୧୯୩୮ ମସିହା ଏପ୍ରିଲ ୨୩ ତାରିଖରେ ମାନ୍ଦ୍ରାଜ ପ୍ରେସିଡେନ୍ସି ଅନ୍ତର୍ଗତ ଗୁଣ୍ଟୁର ଜିଲ୍ଲାର (ବର୍ତ୍ତମାନର ଆନ୍ଧ୍ରପ୍ରଦେଶ) ପଲ୍ଲାପଟଲା ଗ୍ରାମରେ ଜନ୍ମଗ୍ରହଣ କରିଥିଲେ। ତାଙ୍କ ପିତା ସିସ୍ତଲା ଶ୍ରୀରାମମୂର୍ତ୍ତି ଜଣେ ଆୟୁର୍ବେଦିକ ଚିକିତ୍ସକ ଏବଂ ଶିକ୍ଷକ ଥିଲେ। ମାତ୍ର ୯ ବର୍ଷ ବୟସରେ ସେ ପ୍ରଥମ ଥର ପାଇଁ ମଞ୍ଚରେ ସଙ୍ଗୀତ ଗାନ କରିଥିଲେ। ମାତ୍ର ୧୯ ବର୍ଷ ବୟସରେ ୧୯୫୭ ମସିହାର ତାମିଲ ଚଳଚ୍ଚିତ୍ର ‘ବିଧିୟିନ ବିଲାୟାଥୁ’ ମାଧ୍ୟମରେ ସେ ପ୍ରଚ୍ଛଦପଟ ଗାୟିକା ଭାବେ କ୍ୟାରିୟର ଆରମ୍ଭ କରିଥିଲେ।
ପ୍ରଥମ ବର୍ଷରେ ହିଁ ସେ ୬ଟି ଭିନ୍ନ ଭିନ୍ନ ଭାଷାରେ ଗୀତ ରେକର୍ଡ କରିବାର ଗୌରବ ଅର୍ଜନ କରିଥିଲେ। ଜାନକୀଙ୍କ ମାତୃଭାଷା ତେଲୁଗୁ ହୋଇଥିଲେ ହେଁ ସେ ତାମିଲ, କନ୍ନଡ, ମାଲାୟାଲମ୍ ଏବଂ ହିନ୍ଦୀ ଭାଷାରେ ସମାନ ଭାବେ ଦକ୍ଷ ଥିଲେ। ପ୍ରାୟ ୬ ଦଶନ୍ଧି ଧରି ସଙ୍ଗୀତ ଜଗତରେ ଅନନ୍ୟ ପ୍ରତିଭା ପ୍ରଦର୍ଶନ କରିବା ପରେ ୨୦୧୮ରେ ତାମିଲ ଚଳଚ୍ଚିତ୍ର ‘ପନ୍ନାଡି’ ପାଇଁ ସେ ପୁନର୍ବାର କଣ୍ଠଦାନ କରି ନିଜର ୬୦ ବର୍ଷର ମହାନ ସଙ୍ଗୀତ ଯାତ୍ରାରେ ବିରାମ ଲଗାଇଥିଲେ।
