ନୂଆଦିଲ୍ଲୀ,୩ /୯ : ବିଶ୍ୱ ସ୍ୱାସ୍ଥ୍ୟ ସଂଗଠନ ‘ହୁ’ ଗୁରୁତର ଅସୁସ୍ଥ କରୋନା ରୋଗୀଙ୍କ ଚିକିତ୍ସା ନିମନ୍ତେ ଷ୍ଟେରଏଡ ଚିକିତ୍ସାକୁ ଅନୁମତି ଦେଇଛି। ଗତକାଲି ପ୍ରକାଶିତ ଆନ୍ତର୍ଜାତୀୟ କ୍ଲିନିକାଲ ପରୀକ୍ଷଣ ପରେ ଅପେକ୍ଷାକୃତ ଶସ୍ତା ଓ ବହୁଳ ଭାବରେ ଉପଲବ୍ଧ ଷ୍ଟେରଏଡ ଔଷଧ ଗୁରୁତର ଅସୁସ୍ଥ ରୋଗୀଙ୍କୁ କରୋନା ସଂକ୍ରମଣରୁ ବଞ୍ଚିବାରେ ସାହାଯ୍ୟ କରିପାରିବ ବୋଲି ଜଣାପଡିଛି। ନୂତନ ପ୍ରମାଣକୁ ଭିତ୍ତି କରି ବିଶ୍ୱ ସ୍ୱାସ୍ଥ୍ୟ ସଂଗଠନ ନୂତନ ଚିକିତ୍ସା ନିର୍ଦ୍ଦେଶନାମା ଜାରି କରି ଗୁରୁତର ତଥା ଗୁରୁତର ଅସୁସ୍ଥ ରୋଗୀଙ୍କ ଚିକିତ୍ସା ପାଇଁ ଷ୍ଟେରଏଡକୁ ସୁପାରିଶ କରିଛନ୍ତି କିନ୍ତୁ ସାମାନ୍ୟ ରୋଗରେ ଆକ୍ରାନ୍ତ ବ୍ୟକ୍ତିଙ୍କ ପାଇଁ ଏହା ପ୍ରଯୁଜ୍ୟ ନୁହେଁ।
ବିଶ୍ୱ ସ୍ୱାସ୍ଥ୍ୟ ସଂଗଠନର ଏକ ଗୋଷ୍ଠୀ ଦ୍ୱାରା ପରିଚାଳିତ ସାତୋଟି ଅଧ୍ୟୟନରୁ ସଂଗୃହିତ ଫଳାଫଳର ବିଶ୍ଳେଷଣରୁ ଜଣାପଡିଛି ଯେ ଏହି ଗୁରୁତର ଅସୁସ୍ଥ ରୋଗୀମାନଙ୍କ ମଧ୍ୟରେ ସାଧାରଣ ଚିକିତ୍ସା ତୁଳନାରେ ଷ୍ଟେରଏଡ ବ୍ୟବହାର ଯୋଗୁ ଏକ ତୃତୀୟାଂଶ ହ୍ରାସ ମୃତ୍ୟୁ ହାର ହ୍ରାସ ପାଇଛି। ବିଶେଷ କରି ଅତ୍ୟଧିକ ଗୁରୁତର ରୋଗୀ ଯେଉଁମାନେ ଅତିରିକ୍ତ ଅମ୍ଳଜାନ ଆବଶ୍ୟକ କରନ୍ତି ସେମାନଙ୍କ କ୍ଷେତ୍ରରେ ଏହି ଚିକିତ୍ସା ବ୍ୟବସ୍ଥା ଫଳପ୍ରଦ ସାବ୍ୟସ୍ତ ହୋଇଛି। ଆମେରିକାର ମେଡିକାଲ୍ ଆସୋସିଏସନ୍ ପତ୍ରିକା ‘ଜାମା’ରେ ଏହି ତଥ୍ୟ ପ୍ରକାଶ ପାଇଛି।
