ନୂଆଦିଲ୍ଲୀ, ୧୩/୦୫ : ମୁମ୍ବାଇର ମାଲଭାନି ଏବଂ ମନୋରି ଅଞ୍ଚଳରେ ଏକ ବଡ଼ ଧରଣର ଚଢ଼ାଉ କରି କ୍ରାଇମବ୍ରାଞ୍ଚ ଏକ ଡ୍ରଗ୍ସ ଫ୍ୟାକ୍ଟ୍ରି ଏବଂ ଗୋଦାମକୁ ଠାବ କରିଛି। ଏହି ଘଟଣାରେ ପୋଲିସ ମୁଖ୍ୟ ଅଭିଯୁକ୍ତ ଅକରମ୍ ଖାନ୍ ସମେତ ମୋଟ ୧୦ ଜଣଙ୍କୁ ଗିରଫ କରିଛି ଏବଂ ପ୍ରାୟ ୧୪ କୋଟି ଟଙ୍କା ମୂଲ୍ୟର ଡ୍ରଗ୍ସ ଓ କଞ୍ଚାମାଲ ଜବତ କରିଛି। କ୍ରାଇମବ୍ରାଞ୍ଚ ତଦନ୍ତରୁ ଜଣାପଡ଼ିଛି ଯେ ଏହି ଡ୍ରଗ୍ସ ସିଣ୍ଡିକେଟ୍ର ମାଷ୍ଟରମାଇଣ୍ଡ ହେଉଛି ମାଲଭାନି ଅଞ୍ଚଳର ବାସିନ୍ଦା ଅକରମ୍ ଖାନ୍। ପୋଲିସର ସୂଚନାନୁସାରେ, ସେ ଅନେକ ବରିଷ୍ଠ ରାଜନେତାଙ୍କ ସମ୍ପର୍କରେ ଥିଲା ଏବଂ ସେମାନଙ୍କ ଛତ୍ରଛାୟାରେ ଏହି ଡ୍ରଗ୍ସ କାରବାର ଏବଂ ଫ୍ୟାକ୍ଟ୍ରି ଚଳାଉଥିଲା। ତା’ର ଭାଇ ଅଜମଲ୍ ଖାନ୍ ସ୍ଥାନୀୟ ଏକ ମସଜିଦ୍ର ମୁଖିଆ ବୋଲି ଜଣାପଡ଼ିଛି। ପୋଲିସ ଅଜମଲ୍କୁ ପଚରାଉଚରା କରିଥିଲେ ମଧ୍ୟ ପ୍ରମାଣ ଅଭାବରୁ ତାକୁ ଛାଡ଼ିଦେଇଛି। ଏହି ମାମଲାରେ ପୂର୍ବରୁ ଜଣେ ମହିଳା ଅଭିଯୁକ୍ତ ଗିରଫ ହେବା ପରେ ତାଙ୍କ ସ୍ୱାମୀ ଅରବାଜ୍ ୱକିଲ୍ କୁରେଶୀ ଫେରାର ହୋଇଯାଇଥିଲା। ବୈଷୟିକ ଜ୍ଞାନକୌଶଳ ଏବଂ କ୍ରମାଗତ ତଦନ୍ତ ଆଧାରରେ ପୋଲିସ ଗୁଜରାଟ ଏବଂ ମୁମ୍ବାଇର ବିଭିନ୍ନ ସ୍ଥାନରେ ଚଢ଼ାଉ କରି ଫେରାର ଅରବାଜ୍ ସମେତ ଅନ୍ୟ ୯ ଜଣ ଅଭିଯୁକ୍ତଙ୍କୁ ଗିରଫ କରିଛି। ସେମାନଙ୍କ ନିକଟରୁ ପୋଲିସ ଆହୁରି ୧୧ କୋଟି ଟଙ୍କାର ଡ୍ରଗ୍ସ ଜବତ କରିବାରେ ସଫଳ ହୋଇଛି। ବର୍ତ୍ତମାନ ପୋଲିସ ଏହି ବିଶାଳ ଡ୍ରଗ୍ସ ନେଟୱର୍କର ଚେର ଖୋଜିବା ସହ ଏଥିରେ ସମ୍ପୃକ୍ତ ଥିବା ଅନ୍ୟ ବ୍ୟକ୍ତିମାନଙ୍କୁ ଧରିବା ପାଇଁ ତଦନ୍ତ ଜାରି ରଖିଛି।
