ଧର୍ମଗଡ଼: କଳାହାଣ୍ଡି ଜିଲ୍ଲା ଧର୍ମଗଡ଼ ସହରରେ ଗତକାଲି ବିଳମ୍ବିତ ରାତ୍ରିରେ ଏକ ଚାଞ୍ଚଲ୍ୟକର ଡକାୟତି ଘଟଣା ଘଟିଛି। ଧର୍ମଗଡ଼ ଉପଖଣ୍ଡ ଡାକ୍ତରଖାନା ପରିସରରେ ଥିବା ସରକାରୀ ଡାକ୍ତର ଅଜିତ ଦାସଙ୍କ ବାସଭବନରେ ୪ଜଣ ଦୁର୍ବୃତ୍ତ, ଡାକ୍ତରଙ୍କ ମୁହଁ ବନ୍ଦ କରି ତାଙ୍କ ହାତଗୋଡ଼ ବାନ୍ଧି ଲୁଟ କରିଛନ୍ତି। ଡାକ୍ତର ପିନ୍ଧିଥିବା ଦୁଇଟି ସୁନା ଚେନ, ସୁନା ମୁଦି ଓ ଘରେ ଥିବା ସାମଗ୍ରୀ ଖୋଜାଖୋଜି କରି ପ୍ରାୟ ୮୦ ହଜାର ଟଙ୍କା ନଗଦ ଲୁଟି ଡକାୟତମାନେ ଫେରାର ହୋଇ ଯାଇଥିଲେ।
ଏହି ଘଟଣା ପରେ କାର୍ଯ୍ୟରତ କର୍ମଚାରୀମାନେ ନିଜକୁ ସୁରକ୍ଷିତ ମଣୁ ନାହାନ୍ତି। ଅନ୍ୟ ପକ୍ଷରେ ରୋଗୀ କଲ୍ୟାଣ ବୈଠକରେ ବିଭିନ୍ନ ସମୟରେ ଉପଖଣ୍ଡ ଡାକ୍ତରଖାନାଠାରେ ଏକ ପୁଲିସ ଆଉଟ ପୋଷ୍ଟ କରିବାକୁ ଦାବୀ ହୋଇ ଥିଲେ ବର୍ତ୍ତମାନ ସୁଦ୍ଧା ତାହା କାର୍ଯ୍ୟକାରୀ ହୋଇ ପାରିନାହିଁ। ଫଳରେ ଏଭଳି ସମସ୍ୟା ହୋଉଛି ବୋଲି କହିଛନ୍ତି ଡାକ୍ତର ଓ କର୍ମଚାରୀ କହିଛନ୍ତି। ଧର୍ମଗଡ଼ ପୁଲିସ, ସନ୍ଧାନକାରୀ କୁକୁର ଓ ସାଇଣ୍ଟିଫିକ ଦଳ ଘଟଣା ସ୍ଥଳକୁ ଆସି ତଦନ୍ତ ଜାରି ରଖିଛନ୍ତି।
