ନୂଆଦିଲ୍ଲୀ, ୨୧/୦୧ : କେନ୍ଦ୍ର ସରକାର ସାଧାରଣ ଲୋକଙ୍କ ଆର୍ଥିକ ସ୍ଥିତିକୁ ସୁଦୃଢ଼ କରିବାକୁ ବଡ଼ ନିଷ୍ପତ୍ତି ଗ୍ରହଣ କରିଛନ୍ତି । କେନ୍ଦ୍ର ସରକାରଙ୍କ ଅଟଳ ପେନସନ ଯୋଜନାର ଅବଧିକୁ ୨୦୩୦-୩୧ ଆର୍ଥିକ ବର୍ଷ ପର୍ଯ୍ୟନ୍ତ ବୃଦ୍ଧି କରାଯାଇଛି । ଏହା ସହିତ ପ୍ରୋତ୍ସାହନମୂଳକ ଏବଂ ବିକାଶମୂଳକ କାର୍ଯ୍ୟକଳାପ ଏବଂ ଗ୍ୟାପ୍ ଫଣ୍ଡିଂ ପାଇଁ ପାଣ୍ଠି ସହାୟତା ବୃଦ୍ଧିକୁ ମଧ୍ୟ ଅନୁମୋଦନ କରିଛନ୍ତି। ବୁଧବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ବସିଥିବା କ୍ୟାବିନେଟ ବୈଠକରେ ଏହି ପ୍ରସ୍ତାବକୁ ମଞ୍ଜୁରୀ ମିଳିଛି । କ୍ୟାବିନେଟ ବୈଠକ ପରେ ଏକ ସରକାରୀ ବିଜ୍ଞପ୍ତିରେ କୁହାଯାଇଛି ଯେ ଏହି ଯୋଜନା ୨୦୩୦-୩୧ ପର୍ଯ୍ୟନ୍ତ ଜାରି ରହିବ ଏବଂ ଅସଂଗଠିତ ଶ୍ରମିକଙ୍କ ମଧ୍ୟରେ ସଚେତନତା, କ୍ଷମତା ନିର୍ମାଣ ସମେତ ପ୍ରଚାର ଏବଂ ବିକାଶମୂଳକ କାର୍ଯ୍ୟକଳାପ ପାଇଁ ସରକାରୀ ସହାୟତା ପ୍ରଦାନ କରାଯିବ । ୯ ମେ, ୨୦୧୫ରେ ମୋଦୀ ସରକାର ଅସଂଗଠିତ କ୍ଷେତ୍ରରେ ଶ୍ରମିକମାନଙ୍କୁ ବାର୍ଦ୍ଧକ୍ୟ ଆୟ ସୁରକ୍ଷା ପ୍ରଦାନ କରିବା ଉଦ୍ଦେଶ୍ୟରେ ଅଟଳ ପେନସନ ଯୋଜନା ବା ଏପିୱାଇର ଶୁଭାରମ୍ଭ କରିଥିଲେ । ୧୯ ଜାନୁୟାରୀ, ୨୦୨୬ ସୁଦ୍ଧା ୮.୬୬ କୋଟି ଏଥିରେ ଆବେଦନ କରିଛନ୍ତି । ଏପିୱାଇରେ ୬୦ ବର୍ଷ ବୟସରୁ ଆରମ୍ଭ କରି ପ୍ରତି ମାସରେ ୧,୦୦୦ ରୁ ୫,୦୦୦ ପର୍ଯ୍ୟନ୍ତ ନିଶ୍ଚିତ ସର୍ବନିମ୍ନ ପେନସନ୍ ପ୍ରଦାନ କରେ, ଯାହା ଅବଦାନ ଉପରେ ଆଧାରିତ। ହିତାଧିକାରୀ ୬୦ ବର୍ଷ ବୟସ ହେବା ପରେ ପେନସନ୍ ଦେୟ ଯୋଗ୍ୟ ହୁଏ। ସଞ୍ଚୟ ଆକାଉଣ୍ଟରୁ ସ୍ୱୟଂ-ଡେବିଟ୍ ମାଧ୍ୟମରେ ଟଙ୍କା ଦିଆଯାଏ । ପ୍ରତି ମାସିକ, ତ୍ରୈମାସିକ କିମ୍ବା ଅର୍ଦ୍ଧବାର୍ଷିକରେ ଟଙ୍କା ଡେବିଟ୍ ହୋଇଥାଏ । ସଦସ୍ୟଙ୍କ ମୃତ୍ୟୁ ହେଲେ, ପେନସନ୍ ହିତାଧିକାରୀଙ୍କ ସ୍ୱାମୀ କିମ୍ବା ସ୍ତ୍ରୀଙ୍କୁ ସ୍ଥାନାନ୍ତରିତ କରାଯାଏ ଏବଂ ଉଭୟଙ୍କ ମୃତ୍ୟୁ ପରେ ସଂଗୃହିତ କର୍ପସ୍ ନାମିତ ବ୍ୟକ୍ତିଙ୍କୁ ଦିଆଯାଏ ।
