ନୂଆଦିଲ୍ଲୀ, ୦୬/୧୦ : ଆଜିଠୁ ଆରମ୍ଭ ହେବ ଭାରତ ଓ ୱେଷ୍ଟଇଣ୍ଡିଜ୍ ମଧ୍ୟରେ ଟି-୨୦ ଲଢ଼େଇ । ଦୁଇ ଦଳ ମଧ୍ୟରେ ପ୍ରଥମ ଟି-୨୦ ମ୍ୟାଚ୍ ଆଜି ଲକ୍ଷ୍ନୌର ଭାରତ ରତ୍ନ ଶ୍ରୀ ଅଟଳ ବିହାରୀ ବାଜପେୟୀ ଏକାନା କ୍ରିକେଟ୍ ଷ୍ଟାଡିୟମ୍ରେ ଖେଳାଯିବ । ଭାରତୀୟ ସମୟ ଅନୁସାରେ ସନ୍ଧ୍ୟା ୭ଟାରୁ ମ୍ୟାଚ୍ ଆରମ୍ଭ ହେବ । ଘରୋଇ ମାଟିରେ ଖେଳୁଥିବାରୁ ଭାରତୀୟ ଦଳ ଭଲ ପ୍ରଦର୍ଶନ ସହ ସିରିଜ୍ ଆରମ୍ଭ କରିବାକୁ ଲକ୍ଷ୍ୟ ରଖିବ । ଅନ୍ୟପଟେ ୱେଷ୍ଟଇଣ୍ଡିଜ୍ ମଧ୍ୟ ଟି-୨୦ କ୍ରିକେଟ୍ ରେ ନିଜର ଆକ୍ରମଣାତ୍ମକ ଖେଳ ପାଇଁ ପରିଚିତ। ତେଣୁ ପ୍ରଥମ ମ୍ୟାଚ୍ ରେ ଦୁଇ ଦଳ ମଧ୍ୟରେ ଜୋରଦାର ମୁକାବିଲା ଦେଖିବାକୁ ମିଳିପାରେ । ଲକ୍ଷ୍ନୌର ଏକାନା ଷ୍ଟାଡିୟମର ପିଚରେ ବୋଲରଙ୍କୁ ମଧ୍ୟ ସହାୟତା ମିଳିଥାଏ ।
ବିଶେଷ କରି ମ୍ୟାଚ୍ ଆଗକୁ ବଢ଼ିବା ସହ ସ୍ପିନ୍ ବୋଲରଙ୍କ ଭୂମିକା ବଢ଼ିପାରେ । ସେହିପରି ରାତିରେ କାକର ପଡ଼ିଲେ ଦ୍ୱିତୀୟ ଇନିଂସରେ ବୋଲିଂ କରୁଥିବା ଦଳ ପାଇଁ କିଛି ସମସ୍ୟା ହୋଇପାରେ । ତେଣୁ ଟସ୍ ମଧ୍ୟ ମ୍ୟାଚ୍ ରେ ଗୁରୁତ୍ୱ ରଖିପାରେ । ଆଜିର ମ୍ୟାଚ୍ ରେ ଭାରତର ବ୍ୟାଟିଂ ସହ ବୋଲିଂ ଉପରେ ନଜର ରହିବ । ୱେଷ୍ଟଇଣ୍ଡିଜର ବଡ଼ ସଟ୍ ଖେଳିବାରେ ସକ୍ଷମ ବ୍ୟାଟରଙ୍କୁ ରୋକିବା ଭାରତୀୟ ବୋଲରଙ୍କ ପାଇଁ ଏକ ବଡ଼ ଚ୍ୟାଲେଞ୍ଜ ହେବ । ସେହିପରି ପାୱାରପ୍ଲେରେ ଭଲ ଆରମ୍ଭ ଏବଂ ଶେଷ ଓଭରଗୁଡ଼ିକରେ ଦ୍ରୁତ ରନ୍ ସଂଗ୍ରହ ଭାରତ ପାଇଁ ଗୁରୁତ୍ୱପୂର୍ଣ୍ଣ ହେବ । ପ୍ରଥମ ମ୍ୟାଚ୍ ଜିତି ସିରିଜରେ ଆଗୁଆ ହେବା ଲକ୍ଷ୍ୟରେ ଉଭୟ ଦଳ ଆଜି ପଡ଼ିଆକୁ ଓହ୍ଲାଇବେ । ସନ୍ଧ୍ୟା ୭ଟାରେ ଲକ୍ଷ୍ନୌରେ ଆରମ୍ଭ ହେବ ଭାରତ-ୱେଷ୍ଟଇଣ୍ଡିଜ୍ ଟି-୨୦ ମୁକାବିଲା ।
