ନୂଆଦିଲ୍ଲୀ, ୧୨/୦୯ : ଲସ୍କର-ଇ-ତୋଏବା ପ୍ରତିଷ୍ଠାତା ଏବଂ ଘୋଷିତ ଆତଙ୍କବାଦୀ ହାଫିଜ୍ ମହମ୍ମଦ ସଇଦଙ୍କ ବିରୋଧରେ ପୁଣି ଥରେ ଜାମିନ ବିହୀନ ଗିରଫ ପରୱାନା ଜାରି କରିଛନ୍ତି। ଏହି ମାମଲା କାଶ୍ମୀର ଉପତ୍ୟକାରେ ସକ୍ରିୟ ଆତଙ୍କବାଦୀମାନଙ୍କୁ ଅସ୍ତ୍ରଶସ୍ତ୍ର, ଟଙ୍କା ଏବଂ ନିର୍ଦ୍ଦେଶ ଯୋଗାଇବା ଅଭିଯୋଗ ସହିତ ଜଡିତ। ଦୁଇ ମାସରୁ କମ୍ ସମୟ ମଧ୍ୟରେ ଜମ୍ମୁର ଏନଆଇଏ କୋର୍ଟଙ୍କ ଦ୍ୱାରା ହାଫିଜ୍ ସଇଦଙ୍କ ବିରୋଧରେ ଏହା ଦ୍ବିତୀୟ ୱାରେଣ୍ଟ। ଏନଆଇଏ କୋର୍ଟଙ୍କୁ କହିଛି ଯେ ତଦନ୍ତ ସମୟରେ ଜଣାପଡ଼ିଛି, ପାକିସ୍ତାନରେ ରହୁଥିବା ହାଫିଜ୍ ସଇଦ କାଶ୍ମୀରରେ ସକ୍ରିୟ ଆତଙ୍କବାଦୀମାନଙ୍କୁ ଆର୍ଥିକ ସହାୟତା, ଅସ୍ତ୍ରଶସ୍ତ୍ର ଏବଂ ନିର୍ଦ୍ଦେଶ ପ୍ରଦାନ କରୁଛନ୍ତି। ତଦନ୍ତକାରୀ ସଂସ୍ଥା ଅନୁଯାୟୀ, ହାଫିଜ୍ ସଇଦ ବେଆଇନ କାର୍ୟ୍ୟକଳାପ ନିବାରଣ ଆଇନ (ୟୁଏପିଏ) ଅନୁଯାୟୀ ଜଣେ ଆତଙ୍କବାଦୀ ଏବଂ ନିଷିଦ୍ଧ ଆତଙ୍କବାଦୀ ସଂଗଠନ ଲସ୍କର-ଇ-ତୋଏବାର ପ୍ରତିଷ୍ଠାତା। ସଂସ୍ଥା ଏହା ମଧ୍ୟ କହିଛି ସେ ବର୍ତ୍ତମାନ ପାକିସ୍ତାନରେ ଅଛନ୍ତି ଏବଂ ଗିରଫଦାରୀକୁ ଏଡାଇବା ପାଇଁ ଜାଣିଶୁଣି ଆଇନର ପହଞ୍ଚ ବାହାରେ ଅଛନ୍ତି। କୋର୍ଟ ତାଙ୍କ ଆଦେଶରେ କହିଛନ୍ତି, ଅଭିଯୁକ୍ତ ଫେରାର୍ ଅଛନ୍ତି ଏବଂ ତଦନ୍ତକାରୀ ସଂସ୍ଥା ସାଧାରଣ ପ୍ରକ୍ରିୟା ମାଧ୍ୟମରେ ତାଙ୍କୁ ହାଜର କରିପାରି ନାହାନ୍ତି। ଏହା ପରେ କୋର୍ଟ ଏକ ଜାମିନ ବିହୀନ ଗିରଫ ପରୱାନା ଜାରି କରିବାକୁ ଅନୁମତି ଦେଇ ଆଇନଗତ ପ୍ରକ୍ରିୟା ଅନୁଯାୟୀ କାର୍ୟ୍ୟାନୁଷ୍ଠାନ ପାଇଁ ଜମ୍ମୁର ଏନଆଇଏ ପୁଲିସ ମହାନିର୍ଦ୍ଦେଶକଙ୍କୁ ପଠାଇବାକୁ ନିର୍ଦ୍ଦେଶ ଦେଇଛନ୍ତି।
ଜମ୍ମୁ କାଶ୍ମୀର ପୁଲିସର ନାକାବନ୍ଦୀ ଚେକିଂ ସମୟରେ ଜଣେ ସନ୍ଦିଗ୍ଧ ଆତଙ୍କବାଦୀଙ୍କୁ ଗିରଫ କରିବା ପରେ ଏହି ମାମଲା ସାମ୍ନାକୁ ଆସିଥିଲା। ପାଣ୍ଡାଚ ଅଞ୍ଚଳର ଗୁଜର ଟେଣ୍ଟରେ ଅପରେସନ ସମୟରେ ସନ୍ଦିଗ୍ଧ ଆତଙ୍କବାଦୀଙ୍କ ନିକଟରୁ ଏକ ଚାଇନିଜ୍ ଗ୍ରେନେଡ୍ ଏବଂ ୧୫ଟି ଜୀବନ୍ତ କାର୍ଟ୍ରିଜ୍ ଜବତ କରାଯାଇଥିଲା। ପ୍ରାରମ୍ଭିକ ପଚରାଉଚରା ସମୟରେ ଅଭିଯୁକ୍ତଙ୍କୁ ଶ୍ରୀନଗରର ବାସିନ୍ଦା ମହମ୍ମଦ ନକିବ ଭଟ୍ ଭାବରେ ଚିହ୍ନଟ କରାଯାଇଥିଲା। ଏହାପରେ ଜାକୋରା ପୁଲିସ ଷ୍ଟେସନରେ ଆଉ ଏକ ଏଫଆଇଆର ରୁଜୁ ହୋଇଛି। ଏହି ମାମଲା ୟୁଏପିଏ, ଅସ୍ତ୍ରଶସ୍ତ୍ର ଆଇନ ଏବଂ ବିସ୍ଫୋରକ ପଦାର୍ଥ ଆଇନର ପ୍ରାସଙ୍ଗିକ ଧାରା ଅନୁଯାୟୀ ପଞ୍ଜୀକୃତ ହୋଇଛି। ପୂର୍ବରୁ ଜୁଲାଇରେ ଜମ୍ମୁର ଏନଆଇଏ କୋର୍ଟ ପହଲଗାମ ଆତଙ୍କବାଦୀ ଆକ୍ରମଣ ମାମଲାରେ ହାଫିଜ୍ ସଇଦଙ୍କ ବିରୋଧରେ ଏକ ଜାମିନ ବିହୀନ ୱାରେଣ୍ଟ ଜାରି କରିଥିଲା। ଯେଉଁଥିରେ ଏନଆଇଏ ସଇଦଙ୍କୁ ମୁଖ୍ୟ ଷଡ଼ଯନ୍ତ୍ରକାରୀ ବୋଲି ଅଭିଯୋଗ କରିଯାଇଥିଲା।
