ହିନ୍ଦୁ ଧର୍ମରେ ତୁଳସୀ ଗଛକୁ ଅତ୍ୟନ୍ତ ପବିତ୍ର ମନେ କରାଯାଏ। ପୂର୍ବରୁ ଅଧିକାଂଶ ଘରର ଅଗଣାରେ ତୁଳସୀ ଚଉରା ଦେଖିବାକୁ ମିଳୁଥିବା ବେଳେ ଏବେ ଆପାର୍ଟମେଣ୍ଟରେ ରହୁଥିବା ଲୋକେ ଘରର ମୁଖ୍ୟ ପ୍ରବେଶ ଦ୍ୱାର କିମ୍ବା ବାଲକୋନିରେ ତୁଳସୀ ଗଛ ରଖୁଛନ୍ତି। ବାସ୍ତୁ ଶାସ୍ତ୍ର ଅନୁସାରେ, ଠିକ୍ ଦିଗରେ ଓ ଉପଯୁକ୍ତ ସ୍ଥାନରେ ତୁଳସୀ ଗଛ ରଖିବା ଶୁଭ ବୋଲି ବିଶ୍ୱାସ ରହିଛି। ତେବେ ଏହାକୁ ରଖିବା ସମୟରେ କେତେକ ନିୟମ ପ୍ରତି ଧ୍ୟାନ ଦେବା ଜରୁରୀ।
୧. କେଉଁ ଦିଗରେ ରଖିବେ ତୁଳସୀ ଗଛ?
ବାସ୍ତୁ ମତ ଅନୁସାରେ, ଘରର ମୁଖ୍ୟ ପ୍ରବେଶ ଦ୍ୱାର ଉତ୍ତର କିମ୍ବା ପୂର୍ବ ଦିଗକୁ ହୋଇଥିଲେ ସେଠାରେ ତୁଳସୀ ଗଛ ରଖିବା ଶୁଭ ବୋଲି କୁହାଯାଏ। କିନ୍ତୁ ଦକ୍ଷିଣ ଦିଗକୁ ମୁହଁ କରିଥିବା ପ୍ରବେଶ ଦ୍ୱାରରେ ତୁଳସୀ ଗଛ ନରଖିବାକୁ ବାସ୍ତୁରେ ପରାମର୍ଶ ଦିଆଯାଇଛି।
୨. ତୁଳସୀ ପାଖରେ ରଖନ୍ତୁ ନାହିଁ ଜୋତା ଓ ଡଷ୍ଟବିନ୍
ତୁଳସୀ ଗଛ ପାଖରେ ଜୋତା, ଚପଲ, ଡଷ୍ଟବିନ୍ କିମ୍ବା ଝାଡ଼ୁ ରଖନ୍ତୁ ନାହିଁ। ଧାର୍ମିକ ଓ ବାସ୍ତୁ ମାନ୍ୟତା ଅନୁସାରେ, ତୁଳସୀ ଗଛ ଚାରିପାଖ ସଫାସୁତୁରା ରଖିବା ଉଚିତ। ଏହାଦ୍ୱାରା ଘରେ ସକାରାତ୍ମକ ପରିବେଶ ରହିଥାଏ ବୋଲି ବିଶ୍ୱାସ କରାଯାଏ।
୩. ଶୁଖିଯାଇଥିବା ତୁଳସୀ ଗଛକୁ ରଖନ୍ତୁ ନାହିଁ
ଯଦି କୌଣସି କାରଣରୁ ତୁଳସୀ ଗଛ ଶୁଖିଯାଏ, ତେବେ ଏହାକୁ ଘରେ ରଖିବା ଉଚିତ ନୁହେଁ ବୋଲି ଧାର୍ମିକ ମାନ୍ୟତା ରହିଛି। ଶୁଖିଯାଇଥିବା ଗଛକୁ ସମ୍ମାନର ସହ ମାଟିରେ ପୋତି ଦେଇ ନୂଆ ତୁଳସୀ ଗଛ ଲଗାଇବାକୁ କୁହାଯାଏ। ଏହାକୁ ନଦୀରେ ଫିଙ୍ଗିବା ପରିବର୍ତ୍ତେ ପରିବେଶ ଅନୁକୂଳ ଉପାୟରେ ବିସର୍ଜନ କରିବା ଭଲ।
୪. ସନ୍ଧ୍ୟାରେ ଜାଳନ୍ତୁ ଘିଅ ଦୀପ
ବାସ୍ତୁ ଓ ଧାର୍ମିକ ପରମ୍ପରା ଅନୁସାରେ, ତୁଳସୀ ଗଛ ପାଖରେ ପ୍ରତିଦିନ ସନ୍ଧ୍ୟାରେ ଘିଅ ଦୀପ ଜାଳିବା ଶୁଭ ବୋଲି ମନେ କରାଯାଏ। ଏହାଦ୍ୱାରା ଘରେ ସୁଖ, ଶାନ୍ତି ଓ ସମୃଦ୍ଧି ଆସେ ବୋଲି ଧାର୍ମିକ ବିଶ୍ୱାସ ରହିଛି। ଘରର ମୁଖ୍ୟ ଦ୍ୱାରରେ ତୁଳସୀ ଗଛ ରଖିବା ସମୟରେ ଏହି ନିୟମଗୁଡ଼ିକ ପ୍ରତି ଧ୍ୟାନ ଦିଅନ୍ତୁ। ତେବେ ମନେ ରଖନ୍ତୁ, ଏସବୁ ବାସ୍ତୁ ଓ ଧାର୍ମିକ ପରମ୍ପରା ଉପରେ ଆଧାରିତ ବିଶ୍ୱାସ; ଏହାର ବୈଜ୍ଞାନିକ ପ୍ରମାଣ ନାହିଁ।
