ଭୁବନେଶ୍ୱର, ୨୨/୧୧ : ବଡ଼ଓଷାରେ ବାବା ଧବଳେଶ୍ୱରଙ୍କ ବଡ଼ସିଂହାର ବେଶ । ଝଟକୁଛନ୍ତି ବାବା ଧବଳେଶ୍ୱର । ଦିବ୍ୟ ଦର୍ଶନ ପାଇଁ ଭକ୍ତଙ୍କ ଭିଡ଼ । ପବିତ୍ର ବଡ଼ଓଷା ଅବସରରେ ବଡ଼ସିଂହାର ବେଶରେ ଦର୍ଶନ ଦେଉଛନ୍ତି ବାବା ଧବଳେଶ୍ୱର । କଟକ ଜିଲ୍ଲା ଆଠଗଡ଼ ନିକଟସ୍ଥ ପ୍ରସିଦ୍ଧ ଶୈବପୀଠ ଧବଳେଶ୍ୱରରେ ଆଧ୍ୟାତ୍ମିକ ପରିବେଶ । ମହାଦେବଙ୍କ ଦିବ୍ୟ ବେଶ ଦର୍ଶନ କରିବା ସହ ଆଶୀର୍ବାଦ ଲାଭ ପାଇଁ ଶ୍ରଦ୍ଧାଳୁଙ୍କ ମଧ୍ୟରେ ଉତ୍ସାହ । କାର୍ତ୍ତିକ ମାସର ପବିତ୍ର ବଡ଼ଓଷା ଧବଳେଶ୍ୱର ପୀଠର ଏକ ପ୍ରମୁଖ ପର୍ବ । ଏହି ଅବସରରେ ବାବାଙ୍କୁ ସ୍ୱତନ୍ତ୍ର ରୀତିନୀତି ଅନୁସାରେ ପୂଜାର୍ଚ୍ଚନା କରାଯାଇଥାଏ । ସୁସଜ୍ଜିତ ବଡ଼ସିଂହାର ବେଶରେ ମହାଦେବଙ୍କ ଦର୍ଶନ ଭକ୍ତଙ୍କ ପାଇଁ ବିଶେଷ ଆକର୍ଷଣ ପାଲଟିଥାଏ । ବଡ଼ଓଷା ସହ ଧବଳେଶ୍ୱର ପୀଠର ପ୍ରସିଦ୍ଧ ଗଜଭୋଗର ସ୍ୱତନ୍ତ୍ର ସମ୍ପର୍କ ରହିଛି । ପରମ୍ପରା ଅନୁଯାୟୀ ବାବାଙ୍କ ନିକଟରେ ଗଜଭୋଗ ଅର୍ପଣ କରାଯାଏ । ଏହି ପ୍ରସାଦକୁ ଶ୍ରଦ୍ଧାଳୁମାନେ ଅତ୍ୟନ୍ତ ପବିତ୍ର ମନେ କରନ୍ତି । ବଡ଼ଓଷା ବ୍ରତ ପାଳନ କରୁଥିବା ଭକ୍ତମାନେ ଉପବାସ ରଖି ମହାଦେବଙ୍କ ଆରାଧନା କରିଥାନ୍ତି । ମହାନଦୀ ମଧ୍ୟରେ ଅବସ୍ଥିତ ଧବଳେଶ୍ୱର ପୀଠ ଓଡ଼ିଶାର ଅନ୍ୟତମ ପ୍ରସିଦ୍ଧ ଶୈବକ୍ଷେତ୍ର । ବିଶେଷକରି କାର୍ତ୍ତିକ ମାସ ଓ ବଡ଼ଓଷା ସମୟରେ ଏହି ପୀଠର ଧାର୍ମିକ ମହତ୍ତ୍ୱ ଆହୁରି ବଢ଼ିଯାଏ । ବାବାଙ୍କ ଦର୍ଶନ ଓ ପୂଜାର୍ଚ୍ଚନା ମାଧ୍ୟମରେ ପରିବାରର ସୁଖ, ଶାନ୍ତି ଓ ମଙ୍ଗଳ କାମନା କରିଥାନ୍ତି ଶ୍ରଦ୍ଧାଳୁ ।