ନୂଆଦିଲ୍ଲୀ, ୨୮/୧୦ ନାବାଳିକା ଛାତ୍ରୀଙ୍କ ଯୌନ ଶୋଷଣ ମାମଲାରେ ଆଜୀବନ କାରାଦଣ୍ଡ ଭୋଗୁଥିବା ଆଶାରାମଙ୍କ ପାରୋଲ ଅବଧି ଶେଷ ହୋଇଛି । ପାରୋଲ ସରିବା ପରେ ସେ ଏୟାର ଆମ୍ବୁଲାନ୍ସ ଯୋଗେ ଇନ୍ଦୋରରୁ ଯୋଧପୁରରେ ପହଞ୍ଚିଥିଲେ । ତେବେ ବିଳମ୍ବିତ ରାତିରେ ଜେଲରେ ପହଞ୍ଚିବାରୁ ତାଙ୍କୁ ପ୍ରବେଶ ଅନୁମତି ମିଳିନଥିଲା ।ରାତି ପ୍ରାୟ ୧୧ଟାରେ ଆଶାରାମ ଯୋଧପୁର ସେଣ୍ଟ୍ରାଲ ଜେଲରେ ପହଞ୍ଚିଥିଲେ । ଜେଲ ଅଧୀକ୍ଷକଙ୍କ ନିର୍ଦ୍ଦେଶ ଅନୁଯାୟୀ, ତାଙ୍କୁ ସୂର୍ଯ୍ୟାସ୍ତ ପୂର୍ବରୁ ଜେଲରେ ପ୍ରବେଶ କରିବାର ଥିଲା । କିନ୍ତୁ ଧାର୍ଯ୍ୟ ସମୟ ଅତିକ୍ରମ କରିଯାଇଥିବାରୁ ଜେଲ ପ୍ରଶାସନ ତାଙ୍କୁ ଭିତରକୁ ନେଇନଥିଲା । ଫଳରେ ସେ ଏୟାର ଆମ୍ବୁଲାନ୍ସରେ ଫେରିଯାଇଥିଲେ । ଏହି ସମୟରେ ଜେଲ ବାହାରେ ତାଙ୍କ ସମର୍ଥକଙ୍କ ଭିଡ଼ ଜମିଥିଲା ।
ଜେଲରେ ବନ୍ଦୀଙ୍କ ପ୍ରବେଶ ଓ ପ୍ରତ୍ୟାବର୍ତ୍ତନ ପାଇଁ ନିର୍ଦ୍ଦିଷ୍ଟ ନିୟମ ରହିଛି । ସୂର୍ଯ୍ୟାସ୍ତ ପୂର୍ବରୁ ଜେଲରେ ପହଞ୍ଚିବାର ସର୍ତ୍ତ ଯୋଗୁଁ ଆଶାରାମଙ୍କ ଜେଲ ପ୍ରତ୍ୟାବର୍ତ୍ତନରେ ସମସ୍ୟା ଦେଖାଦେଇଥିବା କୁହାଯାଉଛି । ତେବେ ଏହି ଘଟଣା ସମ୍ପର୍କରେ ଜେଲ ପ୍ରଶାସନର ଅଧିକାରିକ ପ୍ରତିକ୍ରିୟା ସାମ୍ନାକୁ ଆସିନାହିଁ । ଜଣେ ନାବାଳିକା ଗୁରୁକୁଳ ଛାତ୍ରୀଙ୍କ ଯୌନ ଶୋଷଣ ମାମଲାରେ ଆଶାରାମଙ୍କୁ ଦୋଷୀ ସାବ୍ୟସ୍ତ କରାଯାଇ ଆଜୀବନ କାରାଦଣ୍ଡ ଦିଆଯାଇଥିଲା। ୨୦୧୩ ଅଗଷ୍ଟ ୧୯ରେ ଦିଲ୍ଲୀର କମଳା ନଗର ଥାନାରେ ଏହି ମାମଲାରେ ଜିରୋ ଏଫ୍ଆଇଆର୍ ରୁଜୁ ହୋଇଥିଲା । ପରେ ମାମଲାଟି ଯୋଧପୁର ପୋଲିସକୁ ହସ୍ତାନ୍ତର କରାଯାଇଥିଲା । ତଦନ୍ତ ପରେ ୨୦୧୩ ଅଗଷ୍ଟ ୩୧ ଓ ସେପ୍ଟେମ୍ବର ୧ ମଧ୍ୟବର୍ତ୍ତୀ ରାତିରେ ଆଶାରାମଙ୍କୁ ଇନ୍ଦୋରସ୍ଥିତ ଆଶ୍ରମରୁ ଗିରଫ କରାଯାଇଥିଲା । ବର୍ତ୍ତମାନ ପାରୋଲ ଶେଷ ପରେ ଜେଲରେ ପ୍ରବେଶ ନମିଳିବା ଘଟଣାକୁ ନେଇ ଚର୍ଚ୍ଚା ହେଉଛି । ଏହା ଉପରେ ଜେଲ ପ୍ରଶାସନର ଆଧିକାରିକ ପ୍ରତିକ୍ରିୟା ମିଳିନାହିଁ ।
