ପାନ ଖାଇବା ଅଭ୍ୟାସ ଅନେକ ଲୋକଙ୍କର ରହିଛି । କେହି ଖାଇବା ପରେ ପାନ ଖାଇବାକୁ ପସନ୍ଦ କରନ୍ତି ତ ଆଉ କେହି ଦିନକୁ ଅନେକ ଥର ପାନ ଖାଇଥାନ୍ତି । କିନ୍ତୁ ନିୟମିତ ପାନ ଖାଇବା ଯୋଗୁଁ ଧୀରେ ଧୀରେ ଦାନ୍ତରେ କଳା ଦାଗ, ହଳଦିଆ ଦାଗ ଏବଂ ମଇଳା ଜମିବା ଭଳି ସମସ୍ୟା ଦେଖାଦିଏ । ବିଶେଷକରି ପାନ ସହିତ ଗୁଆ, ଚୂନ, ଖଇନି କିମ୍ବା ତମାଖୁ ଖାଇଲେ ଦାନ୍ତର ରଙ୍ଗ ଖରାପ ହେବା ସହ ପାଟିର ସ୍ୱାସ୍ଥ୍ୟ ମଧ୍ୟ ପ୍ରଭାବିତ ହୋଇପାରେ ।
ଦାନ୍ତରେ ଦାଗ ରହିବା ଯୋଗୁଁ ଅନେକ ଲୋକ ଖୋଲାଖୋଲି ହସିବାକୁ ସଙ୍କୋଚ କରନ୍ତି । ଏହା ସେମାନଙ୍କ ଆତ୍ମବିଶ୍ୱାସ ଉପରେ ମଧ୍ୟ ପ୍ରଭାବ ପକାଇପାରେ । ତେଣୁ ଦାନ୍ତରେ ଦାଗ ଦେଖାଦେଲେ ଏହାକୁ ଅଣଦେଖା ନକରି ପାଟିର ସ୍ୱଚ୍ଛତା ପ୍ରତି ଧ୍ୟାନ ଦେବା ଜରୁରୀ । ତେବେ ଦାନ୍ତରୁ କଳା ଓ ହଳଦିଆ ଦାଗ କିପରି ସଫା କରିବେ ଆସନ୍ତୁ ଜାଣିବା…
ଦିନକୁ ଦୁଇଥର ବ୍ରଶ୍ କରନ୍ତୁ: ସକାଳେ ଏବଂ ରାତିରେ ଶୋଇବା ପୂର୍ବରୁ ଫ୍ଲୋରାଇଡ୍ଯୁକ୍ତ ଟୁଥପେଷ୍ଟରେ ଦାନ୍ତ ସଫା କରନ୍ତୁ । ଦାନ୍ତ ମଝିରେ ମଇଳା ଜମିବାକୁ ରୋକିବା ପାଇଁ ଫ୍ଲସ୍ ବ୍ୟବହାର କରିପାରିବେ। ଅତ୍ୟଧିକ ଜୋରରେ ଦାନ୍ତ ଘଷନ୍ତୁ ନାହିଁ।
ଦାନ୍ତ ମଝିକୁ ସଫା କରନ୍ତୁ: ଦାନ୍ତ ମଝିରେ ପାନର ରଙ୍ଗ ଓ ଖାଦ୍ୟର ଅଂଶ ଜମି ରହିପାରେ । ଏଥିପାଇଁ ଡେଣ୍ଟାଲ୍ ଫ୍ଲସ୍ ବ୍ୟବହାର କରନ୍ତୁ। ଏହା ଦାନ୍ତ ମଝିରେ ଥିବା ମଇଳା ବାହାର କରିବାରେ ସାହାଯ୍ୟ କରେ ।
ଡେଣ୍ଟିଷ୍ଟଙ୍କ ପାଖରେ ସ୍କେଲିଂ କରନ୍ତୁ: ଯଦି ଦାନ୍ତ ମଝିରେ କଳା ଦାଗ ବହୁତ ଦିନରୁ ରହିଛି, ତେବେ ଘରେ ସାଧାରଣ ବ୍ରଶ୍ କରି ତାହା ସଫା କରିବା ସମ୍ଭବ ନ ହୋଇପାରେ । ଏପରି ସ୍ଥିତିରେ ଦନ୍ତ ଡାକ୍ତରଙ୍କ ପାଖକୁ ଯାଇ ପ୍ରଫେସନାଲ୍ ଡେଣ୍ଟାଲ୍ କ୍ଲିନିଂ ବା ସ୍କେଲିଂ କରାନ୍ତୁ । ଏହା ଦାନ୍ତରେ ଜମିଥିବା ପଥର ଓ ଦାଗ ସଫା କରିବାରେ ସାହାଯ୍ୟ କରେ ।
ପାନ ଓ ତମାଖୁ ଖାଇବା ଛାଡ଼ନ୍ତୁ: ଦାନ୍ତକୁ ସୁସ୍ଥ ଓ ସୁନ୍ଦର ରଖିବା ପାଇଁ ପାନ ଖାଇବା ଅଭ୍ୟାସ ଛାଡ଼ିବା ସବୁଠାରୁ ଭଲ ଉପାୟ । ବିଶେଷକରି ତମାଖୁ ଓ ସୁପାରି ମିଶା ପାନ ଖାଇବା ଦ୍ୱାରା ମୁଖ କର୍କଟ ରୋଗର ଆଶଙ୍କା ବଢ଼ିଥାଏ । ପାନ ଖାଇବା ପରେ ପାଟିକୁ ସଫା ପାଣିରେ କୁଳି କରନ୍ତୁ ।
ଘରୋଇ ଉପାୟରେ ସତର୍କ ରୁହନ୍ତୁ: ଲେମ୍ବୁ, ଲୁଣ, କୋଇଲା, ବେକିଂ ସୋଡା କିମ୍ବା ଅନ୍ୟାନ୍ୟ ଜିନିଷ ଦାନ୍ତରେ ଘଷନ୍ତୁ ନାହିଁ । ଏହା ଦାନ୍ତର ଉପର ସୁରକ୍ଷା ସ୍ତରକୁ କ୍ଷତି ପହଞ୍ଚାଇପାରେ । ଦାନ୍ତ ସଫା କରିବା ପାଇଁ ନିଜ ଇଚ୍ଛାରେ କୌଣସି ରାସାୟନିକ ଦ୍ରବ୍ୟ ବ୍ୟବହାର କରନ୍ତୁ ନାହିଁ ।
ଦାନ୍ତରେ କଳା ଦାଗ ରହିଲେ ଅବହେଳା କରନ୍ତୁ ନାହିଁ: ଯଦି ଦାନ୍ତ ମଝିରେ କଳା ଦାଗ ସହିତ ଯନ୍ତ୍ରଣା, ଦୁର୍ଗନ୍ଧ, ମାଢ଼ିରୁ ରକ୍ତ ବାହାରିବା କିମ୍ବା ଦାନ୍ତରେ ଗାତ ହେବା ଦେଖାଯାଏ, ତେବେ ତୁରନ୍ତ ଦନ୍ତ ଡାକ୍ତରଙ୍କୁ ଦେଖାନ୍ତୁ । କାରଣ ଏହା କେବଳ ପାନର ଦାଗ ନ ହୋଇ ଦାନ୍ତ କ୍ଷୟ ବା କ୍ୟାଭିଟି ମଧ୍ୟ ହୋଇପାରେ ।
ପାନ ଖାଇବା ଯୋଗୁଁ ଦାନ୍ତ ମଝିରେ କଳା ଦାଗ ହୋଇଥିଲେ ଚିନ୍ତା କରନ୍ତୁ ନାହିଁ । ନିୟମିତ ବ୍ରଶ୍ କରିବା, ଡେଣ୍ଟାଲ୍ ଫ୍ଲସ୍ ବ୍ୟବହାର କରିବା ଓ ଦନ୍ତ ଡାକ୍ତରଙ୍କ ଦ୍ୱାରା ସ୍କେଲିଂ କରାଇବା ଦ୍ୱାରା ଦାନ୍ତ ସଫା ରଖିପାରିବେ। ମନେ ରଖନ୍ତୁ, ସୁସ୍ଥ ଦାନ୍ତ ଓ ସୁନ୍ଦର ହସ ପାଇଁ ନିୟମିତ ପାଟିର ଯତ୍ନ ନିଅନ୍ତୁ ।
