ଭୁବନେଶ୍ୱର, ୧୨/୧୦ : ଭୋଟର ତାଲିକାକୁ ତ୍ରୁଟିମୁକ୍ତ ଓ ସଠିକ୍ କରିବା ପାଇଁ ସ୍ୱତନ୍ତ୍ର ଭୋଟର ତାଲିକା ସଂଶୋଧନ (SIR) ଏକ ଆବଶ୍ୟକ ତଥା ଗଠନମୂଳକ ପଦକ୍ଷେପ। ଏହା ଗଣତାନ୍ତ୍ରିକ ପ୍ରକ୍ରିୟା ଉପରେ ଜନସାଧାରଣଙ୍କ ଭରସାକୁ ଆହୁରି ମଜବୁତ କରିବ ବୋଲି କହିଛନ୍ତି ଓଡ଼ିଶାର ମୁଖ୍ୟମନ୍ତ୍ରୀ ମୋହନ ଚରଣ ମାଝୀ। ଦିଲ୍ଲୀରେ SIRକୁ ନେଇ ବିରୋଧୀ ଦଳଗୁଡ଼ିକର ପ୍ରତିବାଦ ମଧ୍ୟରେ ସୋସିଆଲ ମିଡିଆ ପ୍ଲାଟଫର୍ମ Xରେ ନିଜର ମତ ରଖିଛନ୍ତି ମୁଖ୍ୟମନ୍ତ୍ରୀ। ତାଙ୍କ ମତରେ, ଅବାଧ ଓ ନିରପେକ୍ଷ ନିର୍ବାଚନ ପାଇଁ ସଠିକ୍ ଭୋଟର ତାଲିକା ଅତ୍ୟନ୍ତ ଜରୁରୀ। ଏଥିସହ ପ୍ରତ୍ୟେକ ଯୋଗ୍ୟ ନାଗରିକଙ୍କ ମତଦାନ ଅଧିକାର ସୁରକ୍ଷିତ ରହିବା ମଧ୍ୟ ଆବଶ୍ୟକ।
ମୁଖ୍ୟମନ୍ତ୍ରୀ କହିଛନ୍ତି ଯେ, ଭୋଟର ତାଲିକାରେ ଏକାଧିକ ଥର ନାଁ ରହିବା, ମୃତ ବ୍ୟକ୍ତିଙ୍କ ନାଁ ହଟିନଥିବା ଏବଂ ପୁରୁଣା ଠିକଣା ଭଳି ତ୍ରୁଟି ତାଲିକାର ସଠିକତାକୁ ପ୍ରଭାବିତ କରିପାରେ। SIR ମାଧ୍ୟମରେ ଏଭଳି ଅସଙ୍ଗତି ଚିହ୍ନଟ କରିବା, ନକଲି ବା ଦୋହରା ଏଣ୍ଟ୍ରି ହଟାଇବା, ମୃତ ବ୍ୟକ୍ତିଙ୍କ ରେକର୍ଡ ଅପଡେଟ୍ କରିବା ଏବଂ ଠିକଣା ପରିବର୍ତ୍ତନ ଭଳି ତଥ୍ୟ ସଂଶୋଧନ କରିବା ସମ୍ଭବ ହୋଇଥାଏ। ଏହାସହ ସମସ୍ତ ଯୋଗ୍ୟ ଭୋଟରଙ୍କ ନାଁ ତାଲିକାରେ ରହିବା ନିଶ୍ଚିତ କରିବା ମଧ୍ୟ ଏହି ପ୍ରକ୍ରିୟାର ଏକ ଗୁରୁତ୍ୱପୂର୍ଣ୍ଣ ଦିଗ।
SIRକୁ ସମର୍ଥନ କରିବା ସହ ମୁଖ୍ୟମନ୍ତ୍ରୀ ଏହା ମଧ୍ୟ ସ୍ପଷ୍ଟ କରିଛନ୍ତି ଯେ, ସଂଶୋଧନ ପ୍ରକ୍ରିୟାରେ କୌଣସି ଯୋଗ୍ୟ ଭୋଟରଙ୍କ ନାଁ ଭୁଲ୍ରେ ବାଦ୍ ପଡ଼ିବା ଉଚିତ ନୁହେଁ। ତାଙ୍କ ମତରେ, ନିର୍ବାଚନରେ ସମାନ ପ୍ରତିନିଧିତ୍ୱ, ନିରପେକ୍ଷତା ଓ ପ୍ରତ୍ୟେକ ଭୋଟର ମୂଲ୍ୟର ସୁରକ୍ଷା ପାଇଁ ଭୋଟର ତାଲିକାରେ ସଠିକ୍ ତଥ୍ୟ ରହିବା ଜରୁରୀ। ତେଣୁ ସମଗ୍ର ପ୍ରକ୍ରିୟାକୁ ନିରପେକ୍ଷତା, ସତର୍କତା ଓ ଉପଯୁକ୍ତ ଯାଞ୍ଚ ସହ କାର୍ଯ୍ୟକାରୀ କରିବା ଆବଶ୍ୟକ। SIRକୁ ନେଇ ଦିଲ୍ଲୀରେ ବିରୋଧୀ ଦଳଗୁଡ଼ିକର ପ୍ରତିବାଦ ଜାରି ରହିଛି। ଏହି ପରିପ୍ରେକ୍ଷୀରେ ମୁଖ୍ୟମନ୍ତ୍ରୀ ମାଝୀ ଭୋଟର ତାଲିକାର ଶୁଦ୍ଧତା ଓ ଯୋଗ୍ୟ ନାଗରିକଙ୍କ ମତଦାନ ଅଧିକାର, ଉଭୟର ଗୁରୁତ୍ୱ ଉପରେ ଜୋର ଦେଇଛନ୍ତି। ସଠିକ୍ ଭୋଟର ତାଲିକା କେବଳ ଏକ ପ୍ରଶାସନିକ ଆବଶ୍ୟକତା ନୁହେଁ, ବରଂ ଗଣତନ୍ତ୍ରର ମୂଳଦୁଆକୁ ସୁଦୃଢ଼ କରିବାର ଏକ ଗୁରୁତ୍ୱପୂର୍ଣ୍ଣ ମାଧ୍ୟମ। ତେବେ SIRର ସଫଳତା ପାଇଁ ତ୍ରୁଟି ସଂଶୋଧନ ସହ ପ୍ରତ୍ୟେକ ଯୋଗ୍ୟ ଭୋଟରଙ୍କ ଅଧିକାରର ସୁରକ୍ଷା ଉପରେ ମଧ୍ୟ ସମାନ ଗୁରୁତ୍ୱ ଦେବାକୁ ପଡ଼ିବ।
