ଭୁବନେଶ୍ୱର, ୨୮/୦୮ : ନାବାଳିକା ଝିଅର ପରିବାର ଅଭିଯୋଗ କ୍ରମେ ବଡ଼ସାହି ଥାନାରେ ଏକ ମାମଲା ରୁଜୁ କରାଯାଇଥିଲା। ଘଟଣାରେ ସମ୍ପୃକ୍ତ ଥିବା ଜଣେ ଯୁବକଙ୍କୁ ପୋଲିସ ଅଟକ ରଖିଛି। ଅଭିଯୋଗରେ କୁହାଯାଇଛି ଯେ ଖରା ଛୁଟିରେ ସେ ଘରକୁ ଯାଇଥିଲା ବେଳେ ପଡ଼ୋଶୀ ଘରର ଜଣେ ଯୁବକ ତାଙ୍କ ସହ ଦୁଷ୍କର୍ମ କରିଥିଲା। ଅଭିଯୁକ୍ତ ଜଣକ ଘରେ କେହି ନଥିବା ବେଳେ ପରିସ୍ଥିତିର ସୁଯୋଗ ନେଇ ସେ ଦୁଷ୍କର୍ମ କରିଥିଲା। ତେବେ ଘଟଣା କାହାକୁ ଜଣାଇଲେ ଗୁରୁତର ପରିଣାମ ଭୋଗିବାକୁ ପଡ଼ିବ ବୋଲି ମଧ୍ଯ ଧମକ ଦେଇଥିଲା। ଛୁଟି ପରେ ଝିଅଟି ହଷ୍ଟେଲକୁ ଫେରି ଆସିଥିଲା। ପରେ ସ୍କୁଲ କର୍ତ୍ତୃପକ୍ଷଙ୍କ ଦ୍ୱାରା କରାଯାଇଥିବା ପରୀକ୍ଷା ସମୟରେ ସେ ଗର୍ଭବତୀ ଥିବା ଜଣାପଡ଼ିଥିଲା। ଘଟଣା ନେଇ ବିଦ୍ୟାଳୟ ପକ୍ଷରୁ ତାଙ୍କ ପରିବାରକୁ ଜଣାଇଥିଲା। ପରିବାର ପରେ ନାବାଳିକାକୁ ଡାକ୍ତରୀ ପରୀକ୍ଷା ପାଇଁ ନେଇଯାଇଥିଲା। ସେ ପ୍ରାୟ ପାଞ୍ଚ ମାସର ଗର୍ଭବତୀ ବୋଲି ସ୍ପଷ୍ଟ ହୋଇଥିଲା। ତା’ପରେ ଝିଅଟି ପରିବାରକୁ ଘଟଣା ବିଷୟରେ ଜଣାଇଥିଲା। ବଡ଼ସାହି ପୋଲିସ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଛି। ଅଭିଯୁକ୍ତ ଜଣକ ସେହି ଅଞ୍ଚଳର ରବୀନ୍ଦ୍ର ସିଂହ ବୋଲି ଜଣାପଡିଛି। ପୋଲିସ ତାକୁ ଥାନାକୁ ଆଣି ଅଧିକ ତଦନ୍ତ ଆରମ୍ଭ କରିଛି।
