ମହାକାଳପଡ଼ା (ସବ୍ୟୁ )ମହାକାଳପଡ଼ା ବ୍ଲକ ଅଧୀନ ବିଭିନ୍ନ ପାକ୍ସ ରେ ଲାଗିରହୁଥିବା ଅନିୟମିତତା ଅନେକ ସମୟରେ ମ୍ୟାନେଜ ହେଇଥିବାର ନଜିର ଥିବା ବେଳେ ଛତର ପାକ୍ସ ରେ ତାହା ହୋଇପାରିନାହିଁ l ଯାହା ଫଳରେ ପାକ୍ସ ଅଧୀନ କିଛି ଚାଷୀ ଅନିୟମିତତା ବିରୁଦ୍ଧରେ ପୁଞ୍ଜିଭୂତ ଅଶାନ୍ତି ନେଇ ଶୁକ୍ରବାର କାର୍ଯ୍ୟାଳୟ ପରିସର ରେ ଧାରଣା ରେ ବସିଥିଲେ l ଧାରଣା ଦେବା ପୂର୍ବରୁ ଚାଷୀ ପାକ୍ସ ସଭାପତି, ସମ୍ପାଦକ, ଏଆରସିଏସ ଙ୍କୁ ବହୁ ପୂର୍ବରୁ ଲିଖିତ ଅଭିଯୋଗ କରି ସୁଫଳ ନପାଇବାରୁ ଆନ୍ଦୋଳନାତ୍ମକ ପନ୍ଥା ଆପଣେଇଥିବାର କହନ୍ତି l ଚାଷୀ ପଞ୍ଜିକରଣ, ସାରବିକ୍ରୟ, ମଣ୍ଡି ରେ ଧାନ ଦେବା ସମୟରେ ଅସୁବିଧା ସମେତ ବିଭିନ୍ନ ସମସ୍ୟା ନେଇ ଧାରଣା ରେ ବସିଥିଲେ l ପୂର୍ବତନ ସମ୍ପାଦକ ଙ୍କ ପୁଅ ତଥା ଡାଟା ଏଣ୍ଟ୍ରି ଅପରେଟର (ଡିଇଓ ) ଭାବେ କାର୍ଯ୍ୟକରୁଛନ୍ତି ଅଧିକାଂଶ ସମୟରେ ଚାଷୀ ଙ୍କ ପ୍ରତି ଅବହେଳା ପ୍ରଦର୍ଶନ କରୁଥିବାର ଅଭିଯୋଗ କରୁଛନ୍ତି l ଏପରିକି ବାହାର ତହସିଲ ରେ ଥିବା ଚାଷୀ ଓ ଚାଷ ଜମି କୁ ପଞ୍ଜିକୃତ କରୁଥିବାର ଅଭିଯୋଗ କରନ୍ତି l ସେହିପରି ସମ୍ପାଦକ ଦାୟିତ୍ୱ ରେ ଥିବା ସହସମ୍ପାଦକ ଭାଗଚାଷି ମାନଙ୍କୁ ପଞ୍ଜିକରଣ କରିବାରେ ଅସହଯୋଗୀ ସାଜୁଛନ୍ତି l ଏନେଇ ଉଦୟ ସାହୁ, ଫକୀର ସାହୁ, ହେମନ୍ତ ପ୍ରଧାନ, ନିର୍ମଳ ପ୍ରଧାନ ସମେତ ୧୦ରୁ ଉର୍ଦ୍ଧ୍ଵ ଚାଷୀ ଧାରଣାରେ ସାମିଲ ଥିଲେ l ଧାରଣା ସ୍ଥଳରେ ଚାଷୀ ଅନ୍ୟାୟ ଅନୀତି ଓ କାର୍ଯ୍ୟରତ କର୍ମଚାରୀ ଙ୍କ ମନମାନି ଙ୍କୁ ଘୋର ନିନ୍ଦା କରିଥିଲେ l ଏପରିକି ଦୁର୍ନୀତିଗ୍ରସ୍ତ କର୍ମଚାରୀ ଙ୍କ ବହିଷ୍କାର ଦାବି କରି ବସିରହିଥିଲେ l ଅପରାହ୍ନ ରେ ପାକ୍ସ ର ସଭାପତି ଧାରଣା ସ୍ଥଳରେ ପହଂଚି ସମ୍ପାଦକ ଓ କିଛି ବୋର୍ଡ ସଭ୍ୟ ଙ୍କ ଉପସ୍ଥିତି ରେ ଦୀର୍ଘ ସମୟ ଆଲୋଚନା କରିଥିଲେ l ସର୍ବଶେଷରେ ଧାରଣାରତ ଚାଷୀ ବହୁ ବୁଝା ସୁଝା ପରେ ଧାରଣାରୁ ଓହରିଥିଲେ l
